O plantel de Albés

A confianza en Rubén Albés por parte do Lugo vai máis aló de darlle un persoal que lle permita salvar a categoría a tempada vindeira. Desde o club cren que o vigués pode colaborar coa dirección deportiva en materia de incorporación de xogadores e é unha voz importante para confeccionar o cadro de persoal para a campaña 2021-2022.

Varios dos principais obxectivos deste mercado estival virán da súa man e xa achegou varios nomes da súa enteira confianza que están encima da mesa do director deportivo branquivermello, Mauro Pérez, e do presidente do club, Tino Saqués.

"Rubén Albés fixo e un gran traballo a tempada pasada e entendemos que o volverá a facer nesta. De feito, xa está a traballar en sintonía con Mauro (Pérez) e para todo o sistema da pretemporada. Aínda que estea de vacacións está pendente de todo e tendo reunións", revelaba o mandatario do club o pasado mércores.

A primeira fichaxe do equipo, o extremo abulense David Mayoral foi unha recomendación de Albés –e do mesmo axente que o olívico: Joaquín Vigueras–, quen o tivo ás súas ordes durante o seu paso polo Valladolid B e o Hermannstadt romanés.

Albés tamén ten sinalada en vermello a continuidade dun dos seus principais baluartes no equipo a pasada campaña: o defensa Diego Alende, titular nas últimas xornadas no Lugo e co que coincidira no Celta B.

Outro dos obxectivos de Albés e o Lugo é o polivalente Juan Antonio Ros, tal e como indicou Ángel García e puido corroborar este xornal. O futbolista que acaba contrato coa filial do Vilarreal xa estivo ás ordes do vigués no Celta B e permitiríalle ao técnico branquivermello contar cun xogador que se desenvolve como mediocentro e central, dun corte similar ao Carlos Pita nas últimas tempadas.

O Lugo e Albés tamén apuntaron a un clásico de cada verán e que comparte axencia con Ros –Aclama–, o extremo esquerdo do Celta Juan Hernández.

Hernández acabou cesión en Sabadell e o Lugo sería un dos destinos que baralla o goleador lorquino. A presenza de Albés no club –co que coincidiu na filial do club vigués e no que explotou na campaña 2017-2018 anotando 14 dianas– é un punto a favor para que, por fin, haxa fumata branca.

Outro futbolista ofensivo na axenda branquivermella é Alberto Solís, centrocampista de gran calidade que finalizou contrato co Celta B e que tamén estivo con Albés. Con todo, o sevillano parece máis próximo de retornar a Andalucía e unirse ao Málaga.