O adestrador do Cafés Candelas Breogán, Tito Díaz, mostrouse satisfeito co traballo do seu equipo nunha semana complicada polos problemas físicos e ante un rival de enorme entidade. "Quero felicitar ao equipo polo esforzo. Foi unha semana moi difícil para nós porque tivemos moitos problemas para poder estar dez xogadores. Todo isto complicounos moitísimo o adestrar con normalidade e isto viuse nun momento do partido, sobre todo no terceiro cuarto, cando o Barcelona apertou en defensa. Aí, o meu equipo mostrou o esforzo, a vontade e o desexo. Puidemos volver ao partido, pero non tivemos sorte porque se pecha a primeira cun triplo deles e péchase o partido tamén con outro triplo deles", manifestou.
Á hora de analizar o choque, o técnico foi claro. "O primeiro cuarto foi bo pola nosa banda, no que estivemos activos, e mentres tivemos frescura xogamos con ritmo. No segundo, mantivemos bastante ben ao rival a pesar do seu acerto. Tras o descanso non estivemos ben, o cansazo e a semana tan dura provocou que o Barcelona abrise unha brecha e estivemos desorganizados en ataque, e non hai que esquecer que temos dous xogadores que acaban de chegar. O equipo mellorou despois, puido correr e hai que encomiar o esforzo do meu equipo e o nivel de acerto do Barcelona. A diferenza estivo aí. Traballamos ben no ataque e en varias facetas estivemos á altura, aínda que nos faltou organización cando apareceu o cansazo", dixo.
O técnico do conxunto lucense quixo deixar claro que mirou tamén os descansos e a posibilidade de rotar, ademais de deixar moi claro que agora empeza o máis importante. "O noso futuro empeza o luns (por hoxe). Non quixemos arriscar e rotei aos xogadores. Fomos capaces de gañar dous cuartos ante un gran rival, pero o terceiro condenounos", sentenciou o técnico lucense.
