As Guerreiras Laranxas partiron onte cara a Málaga coas súas maletas repletas de ilusión para intentar conquistar a terceira coroa ligueira para o Pescados Rubén na Primeira División feminina de fútbol sala logo das conseguidas nas tempadas 2012-13 e 2015-16.
O conxunto burelense coñecerá este xoves ao seu rival polo título, que sairá do enfrontamento que disputarán ás 20.00 horas, no Palacio Martín
O conxunto mariñán leva xa varias semanas adestrando e intentando porse a punto para afrontar o reto con absolutas garantías, aínda que sabendo que o seu rendemento pode ser unha incógnita ao ser o domingo (17.30 horas) o seu primeiro encontro logo de máis de tres meses de parón. Isto supón unha certa desvantaxe respecto do seu rival do domingo, que hoxe terá a oportunidade de testar o seu estado de forma e adquirir ritmo para a pelexa pola liga.
Julio Delgado disporá en principio do persoal ao completo, se non se producen baixas de última hora. A gran novidade respecto dos encontros pre-covid será a á-peche brasileira Cami Gadeia, que non puidera debutar tras regresar de Brasil no mercado de inverno por mor dunha molesta lesión e que agora adestrou con normalidade xunto ao resto das súas compañeiras. Tamén estará ao servizo do técnico salmantino Cris Pérez, que traballou durante unhas semanas no hospital de Alcalá como enfermeira para axudar durante o estado de alarma, pero que se reincorporou ao club laranxa cando comezaron os adestramentos colectivos.
As sensacións dentro do persoal son moi boas, xa que tras dúas semanas moi duras de axuste, as últimas sesións foron xa outra cousa, con moito máis ritmo e aclimatación ao xogo con balón. Tamén o traballo sicológico realizado por Delgado e Lucas parece encamiñado a que o equipo estea ben preparado para afrontar o reto de converterse no gran dominador do fútbol sala feminino español.
APOIO INSTITUCIONAL. Esta semana foi tamén intensa en canto a mensaxes de apoio para as xogadoras burelenses, que recibiron a visita no pavillón Vista Alegre do deputado provincial Efrén Castro, para desexarlles sorte, e onte mesmo trasladáronse ao Concello de Burela, onde o alcalde, Alfredo Llano, tamén lles mostrou o apoio e o agradecemento do pobo de Burela por seguir levando o seu nome por toda a xeografía nacional.
Llanoanimou ao corpo técnico e ao persoal a conquistar un novo título e recordou que o Concello de Burela terá representación na final coa presenza do tenente de alcalde e concelleiro de Deportes, Ramiro Fernández Rei, que presenciará a final en terras malacitanas.
