O Río Breogán superou con solvencia as seis primeiras xornadas da Liga Endesa. Seis encontros que lle enfrontaban a cinco rivais de aspiracións e, sobre todo, orzamentos moito máis ambiciosas que as do equipo lucense.
Os xogadores de Paco Olmos medíronse con tres dos actualmente catro primeiros clasificados (Barcelona, Real Madrid e Tenerife), a dous rivais que aspiran a clasificarse, como mínimo, para os play off (Unicaja e Burgos) e a un rival directo para evitar o descenso, o Betis.
Tres triunfos e tres derrotas supoñen unha bagaxe inesperada para un recentemente ascendido como o Río Breogán. Pero máis aló dos resultados, o balance dese primeiro tramo vai máis aló.
A primeira lectura é que os xogadores de Paco Olmos demostraron sobradamente ser competitivos nunha competición tan dura como a liga Endesa. Incluso que o seu atractivo baloncesto baseado na orde pero tamén nunha gran intensidade, esforzo e actitude defensiva e nun espírito de loita que lle permite non descolgarse nunca dos partidos -nas tres derrotas chegou con opcións aos dous minutos finais- fixo que o Río Breogán xa non sexa visto como un recentemente ascendido. Gañouse o respecto da liga.
Ten mérito que a pesar dos rivais que tivo enfronte, o conxunto breoganista ten un average favorable de 51 puntos, pero aínda é máis destacado que só o Barcelona e o Real Madrid encaixen menos puntos que o equipo breoganista.
Pero todo o bo do visto ata o momento ten que ser ratificado nas próximas xornadas. No seguinte tramo de competición o Río Breogán enfróntase, practicamente en todos os partidos, a rivais que en maior ou menor medida poden estar ao final de competición en loita por evitar as dúas últimas posicións. é, polo tanto, agora cando os homes de Paco Olmos terán que ratificar todo o bo visto ata agora.
As boas sensacións mostradas ata agora deberían servir para que o Río Breogán afronte con confianza o que vén, demostrou que sabe e que pode, pero agora engádese unha variante practicamente inexistente ata agora, salvo no partido ante o Betis, e é a necesidade de gañar e a presión engadida de ter que facelo e é importante comprobar como responden os celestes nese escenario.
Visita a Zaragoza. O novo periplo breoganista dará inicio o vindeiro sábado coa visita ao Casademont Zaragoza, equipo que gañou os dous primeiros encontros pero que agora mesmo encadea catro derrotas e que, polo tanto, necesita acabar con ese negativo refacho.
Despois, o Río Breogán xogará dous encontros consecutivos no Pazo. O domingo 31 recibirá ao Murcia - actual terceiro clasificado- e o sábado 6 de novembro á Gran Canaria . Despois, visitará ao Manresa, recibirá ao Joventut e finalizará o segundo periplo de seis xornadas en Bilbao.
O persoal do Río Breogán renova hoxe os adestramentos tras a xornada de descanso deste luns. En principio, o encontro ante o Real Madrid non tivo consecuencias físicas para ningún xogador e, polo tanto, espérase que Paco Olmos poida empezar a preparar o encontro do próximo sábado (18.00 horas) no Pavillón Príncipe Felipe ante o Casademont Zaragoza.
A expedición breoganista iniciará a viaxe, que realizarán en autobús, despois do adestramento do próximo xoves. O persoal do Río Breogán exercitarase o venres ás 14.00 horas no que será o escenario do partido.
O Zaragoza xoga na Fiba Europe Cup mañá Antes de afrontar o encontro fronte ao Río Breogán, o Casademont Zaragoza desprazarase a Israel, onde mañá se enfrontará co Gilboa Galil na segunda xornada da Fiba Europe Cup.
Nesta competición, os maños empezaron con derrota na súa visita ao Avtodor Saratov ruso (100-80). Na liga Endesa, o equipo de Jaume Ponsarnau gañou nas dúas primeiras xornadas a Manresa (98-91) e Bilbao (76-100) e logo perdeu de forma consecutiva ante Burgos (54-75), Valencia (70-76), Tenerife (90-65) e Barça (76-63)
