Os atletas Nuno Costa e Paula Mayobre eran os grandes candidatos a levar a vitoria na sétima edición do Medio Maratón Palas-Melide e ambos cumpriron os prognósticos cun triunfo, ademais, con notable vantaxe sobre o resto dos seus rivais.
Nuno Costa demostrou que agora mesmo é o gran dominador das probas populares en Galicia e que estas distancias non teñen secretos para el. O deportista portugués, gañador da pasada edición, ofreceu unha auténtica exhibición xa desde os primeiros quilómetros e marcou as diferenzas cos seus grandes rivais. O atleta luso foi o gañador do Medio Maratón Cidade de Lugo El Progreso de Lugo o pasado 12 de maio.
Nuno Costa chegou á meta cun tempo de 1.08.14 minutos, cunha vantaxe de máis de catro minutos sobre o segundo clasificado, Lolo Penas, outro atleta cun gran palmarés e un clásico deste tipo de probas. Penas acabou o percorrido cun tempo de 1.12.25 horas.
A terceira posición na liña de meta correspondeulle a Anxo Castro, cunha marca de de 1.14.04 minutos despois dunha importante e dura pugna con Carlos Lorenzo, que foi finalmente cuarto na meta de Melide. Foi unha carreira na que os favoritos non fallaron, pero Nuno Costa estivo a un nivel superior.
Na competición feminina todos os focos estaban pendentes de Paula Mayobre e é que a atleta ferrolá chegaba como a principal candidata despois de ser a mellor na pasada edición da proba e este sábado tampouco houbo sorpresas en Melide.
Paula Mayobre levou o triunfo ao marcar na liña de meta un tempo de 1.25.26 horas, cunha marxe de máis de dous minutos sobre a segunda clasificada, que non foi outra que Beatriz Fernández, esta con unha marca de 1.27.44 minutos.
O podio completouno María Jesús Gestido, unha atleta que tamén conta con numerosos triunfos nas probas galegas e que chegaba como aspirante a todo. Gestido chegou á meta cun tempo de 1.29.31 horas.
A proba respondeu novamente ás expectativas coa participación de 800 atletas e un percorrido bastante esixente e que tivo un desenlace no que nin Nuno Costa nin Paula Mayobre deixaron lugar á sorpresa en ningún momento.
A competición pechouse coa entrega de premios aos deportistas máis destacados nas diferentes categorías.
