Rotacións condicionadas nun torneo proclive aos cambios no once. A enésima baixa no Lugo, a de Fernando Seoane, danado nun ombreiro no duelo do pasado venres en Santo Domingo ante o Alcorcón, será un novo inconveniente para un Rubén Albés que repite, por terceira vez nesta primeira volta, semana de tres partidos. Coa Copa do Rei no medio —ante o Unión Adarve en Madrid—, o técnico vigués buscará repartir esforzos para que a carga física non se cebe aínda máis sobre un once sobreexplotado.
Recitado case de memoria, sen opción para novos integrantes polo bo rendemento duns e as lesións e ausencias doutros, o equipo titular do Lugo formou case de forma invariable nestes case catro meses de competición.
As doenzas dos xogadores foron as principais culpables das pequenas modificacións nos onces de Albés. O mellor exemplo está baixo paus, onde Whalley e Vieites repartíronse o sitio baixo os paus como consecuencia da lesión na man do primeiro e a picada muscular do segundo.
Tamén os problemas físicos foron a causa da entrada de Ricard Sánchez por Campabadal no lateral dereito e de Cuéllar por Gerard Valentín no extremo destro. A punta do ataque tamén sufriu o peso das lesións para optar primeiro por Manu Barreiro coa lesión de pube de Carrillo e polo murciano despois cos problemas físicos do compostelán.
O resto do equipo titular apenas variou, nin cando os partidos se acumularon. Ros, Alende e Xavi Torres ocuparon o centro da zaga con Lebedenko no carril esquerdo, mentres que Hugo Rama e Señé formaron por diante e Chris Ramos estivo no extremo esquerdo.
Rubén Albés apenas realizou rotacións nas semanas de tres partidos
Nas semanas de tres partidos apenas cambiou Albés. Realizou dous cambios entre a xornada décima e a undécima, coa entrada de Ricard por Campabadal e de Joselu por Carrillo. Entre a undécima e a duodécima foi o número maior, con Campabadal por Ricard, Seoane por Señé, Iriome por Gerard e Carrillo por Chris Ramos.
Entre o número 13 e a 14 só cambiou a Gerard por Cuéllar pola lesión do primeiro, mentres que entre a 14 e a 15 repetiu a once inicial.
No duelo copeiro en terreo do Unión Adarve madrileño Rubén Albés modificará substancialmente o seu once, aínda que co asterisco do centro da defensa e o centro do campo. No posto de central terá que repetir algún titular, xa que só conta con Alberto Rodríguez —inédito co Lugo en competición oficial— como recambio. A lesión de Álex Pérez, que enlaza doenza tras doenza e apenas xogou sete minutos, impediralle estar ante o líder do Grupo 1 da Segunda RFEF.
Pita pode ser unha opción para xogar atrás, pero a máis que probable ausencia de Seoane pola súa lesión no ombreiro e os problemas de nocello de Hugo Rama, deixan ao herculino como alternativa para dar descanso a Señé e formar á beira de Juanpe no centro do campo.
Coa recuperación de Ricard Sánchez e a máis que probable de Campabadal permitirán que o resto do equipo si poida ser novo con xogadores como Canella, Iriome, Sebas Moyano, Joselu ou Manu Barreiro para pasar de rolda na Copa do Rei.
