O Breogán confirmou este venres a incorporación de Sergi Vidal polo Cafés Candelas Breogán, a onde chega cun contrato temporal.
Sergi Vidal incorpórase ao @Cafescandelas Breogán. Benvido! #ForzaBreo #Fagamosequipo #Lugocambia https://t.co/sNQVWiTEdC pic.twitter.com/T6BHdXpIs4
— Cafés Candelas Breogán (@CBBreogan) 14 de setembro de 2018
A situación física do plantel do Breogán obriga aos técnicos a estar atentos ao mercado para aproveitar calquera opción que sirva para atenuar os efectos das baixas. Sen perder de vista a posibilidade de ter que incorporar a un xogador interior no caso de Norel teña que pasar polo quirófano, a baixa de Arco abriu a posibilidade de incorporar, neste caso de forma temporal, a outro xogador.
Neste sentido o club lucense realizou unha oferta a Sergi vidal, que esta mesma semana rescindiu o seu contrato co Joventut. Lezcano, ao termo do encontro deste xoves, evitou facer calquera comentario, sinalando que "cando se faga algunha contratación anunciarao o club" . E este venres así o fixo o Breogán.
"VALEU". Do encontro deste xoves, o técnico destacou que fora positivo. "Valeunos moito porque levamos tempo traballando só con seis ou sete xogadores e necesitabamos facer cinco contra cinco, porque non o podemos facer nos adestramentos. Sérvenos para ver todos os fallos que temos e o camiño a seguir para mellorar, neste sentido foi un test moi válido". Tamén destacou que a recuperación de Redivo. "Vai polo bo camiño. Dos demais hai que esperar que sigan o seu proceso de recuperación".
PARTIDO EN OVIEDO. O Breogán volve xogar esta tarde, 21.00 horas, en Oviedo ante o Manresa en partido do circuíto Movistar.