O internacional nixeriano Daniel Ochefu e o Cafés Candelas Breogán chegaron a un acordo para que o xogador quede desvinculado da entidade galega a falta dun partido e co equipo xa descendido a LEB Ouro.
O Breogán anunciou a desvinculación do xogador nun comunicado no que lle desexa "o mellor no seu futuro".
Ochefu, que ten 25 anos e mide 2,11 metros, chegou ao equipo lucense o 2 de abril procedente de Stockton Kings da G-League norteamericana, co que promediara 14,3 puntos e 8,8 rebotes en 39 partidos.
O pivote disputou catro partidos co Breogán e promediou once minutos, dúas faltas persoais, un tapón, 4,5 puntos e 5,3 de valoración.
Unha lesión de xeonllo impediulle achegar máis ao equipo na recta final da tempada, na que o Breogán consumou o seu descenso.