A ocasión do verán

Un clásico do verán, os canteiráns, o primeiro equipo, os partidos de preparación na pretemporada e, neste caso, un novo técnico, Hernán Pérez Custa, que substitúe a Rubén Albés á fronte da nave do Lugo.

O técnico asturiano conta no mes de preparación con varios futbolistas da filial, principalmente porque o persoal con que o Lugo iniciará a liga non está aínda ao completo, pero tamén porque algún dos mozos pode tirar abaixo a porta. De feito, o adestrador afirmou en máis dunha ocasión estar "sorprendido" co rendemento dos mozos do Polvoreira e que vai tirar deles" durante o ano.

é unha boa noticia. A canteira é importante para todo club e a xeración de futbolistas que xuntou a Polvoreira dá pé á esperanza. Coa filial en Segunda RFEF, o salto de categoría é menor e a opción de utilizar ás promesas branquivermellas en Segunda é máis real que nunca.

Once xogadores tiveron minutos no que vai de pretemporada. Non é o caso dos lesionados, Andrés Castrín e Leandro Antonetti, dous dos talentos nos que máis confía o club.

Na portería, Julen segue crecendo a pasos axigantados. é un dos mellores gardametas que deu a canteira en moito tempo. Pero as súas opcións co primeiro equipo son limitadas pola presenza de Sequeira e Whalley. En calquera caso, o ascenso a Segunda RFEF permitiralle seguir progresando na Polvoreira.

En liña defensiva, Hérnan Pérez utilizou a Torrado, Expósito, Pablo Castrín e Luís Castro. Mentres non chegue un lateral dereito para acompañar a Caveira, Torrado e Expo poderían ir convocados. Dun nivel similar, ambos os deixaron boa impresión.

A sala de máquinas está completa. Fidalgo xogou os tres primeiros partidos, pero xa se adestra coa filial. Dani Vidal tivo minutos en Copa do Rei e a súa gran tempada pasada cedido no Coruxo serviulle para demostrar que ten o fútbol na cabeza. Se hai baixas, terá a súa oportunidade.

Un pouco máis adiantado xoga Álex Ramos. O mozo de Arteixo non tivo a ocasión de adestrar cos maiores de forma regular ata este xullo. Foi peza crave para o ascenso da Polvoreira. A súa pretemporada está a ser moi boa, polo que seguro que Hernán Pérez apuntouno na súa axenda.

David Vermello, máximo goleador da filial, e Idrissa tamén intentaron impresionar. Non conseguiron ver porta, pero as sensacións foron positivas. O mauritano é un avión desde o costado e as súas calidades poderían ser utilizadas nalgún encontro ligueiro. Antonetti é unha das maiores promesas do Lugo. Xa debutou con Rubén Albés sendo xuvenil a pasada tempada. O portorriqueño sofre unha pubalxia que lle impediu demostrar o seu potencial este verán.

A pelota está no tellado de Hernán Pérez. Os mozos xogaron as súas cartas e demostraron estar capacitados para axudar ao primeiro equipo. Ilusión e ganas non lles faltan.