O reto das tres vitorias

O Carlos Belmonte como espazo onde tomar o impulso necesario para aumentar o número de vitorias consecutivas, incrementar a seis o número de veces que se enlazou tres triunfos seguidos nas últimas oito tempadas en Segunda División e que Eloy Jiménez poida opositar á marca de Francisco como o técnico capaz de facer a mellor serie de vitorias na liga na categoría de prata.

Pero antes de nin tan sequera pensar nos doce puntos de doce posibles logrados polo adestrador almeriense na tempada 2017-2018 —entre a xornada 4 e a 8 fronte ao Albacete (0-1), Zaragoza (2-1), Barcelona B (1-2) e Tenerife (1-0)—, o cadro branquivermello debe imporse este domingo (18.30 horas) ao Rácing de Santander para emular as boas series de tres vitorias seguidas conseguidas outras catro veces xunto á citada da 2017-2018. Esa serie —finalizada o 1 de outubro de 2017 ante o Tenerife— foi a última na que o Lugo venceu máis de dous partidos seguidos.

A campaña do retorno a Segunda, a 2012-2013, o conxunto lucense, baixo o mando de Quique Setién como técnico, foi capaz de sumar dúas veces nove puntos de forma continuada.

A primeira ocorreu entre o 8 e o 22 de decembro de 2012, cando conseguiu vencer en terreo do Almería por 0-1 cun gol de Óscar Díaz, acabou co Castela unha semana despois por 3-2 grazas ao acerto de Víctor e Óscar Díaz e Fran Sol, e 0-1 en Sabadell cunha diana de Óscar Díaz.

A seguinte serie de tres triunfos foi entre o 17 e o 30 de marzo, cando derrotou ao Murcia na Condomina cun solitario gol de Pablo Álvarez, fixo o propio ante o Rácing de Santander no Ángel Carro (3-2) con Tena, Óscar Díaz e Iago como goleadores, e endosoulle un 4-0 ao Xerez cun hat trick de Airam e un tanto en propia meta de Galán.

Na 2014-2015, tamén con Quique Setién, o Lugo foi capaz de imporse ao Recreativo en casa (2-1) con dianas de Lolo Pla e Luis Fernández, 0-2 no Sadar ante o Osasuna grazas ao acerto de Iriome e David García en propia porta, e 3-2 ao Barça B con tantos de Israel Porto, Borja Gómez e Pablo Caballero.

Na 2016-2017, con Luis César Sampedro sentado no banco lucense, o cadro branquivermello sumou os tres puntos contra o Sevilla Atlético na xornada 4, cun gol de Joselu. Sete días despois, o 17 de setembro, tomou o Martínez Valero para golear 0-3 ao Elxe grazas a Pelegrín na súa propia portería, Campillo e Igor Martínez. Ademais, tamén lograron un resultado positivo en casa ante o Valladolid grazas ao único gol de Joselu.

O domingo, o Lugo ten a opción de manter o seu bo momento logo de imporse ao Rayo Vallecano e ao Albacete, ambos con senllos 1-0, para crecer na clasificación.