A avenida de Ramón Ferreiro acolle este sábado a primeira proba da vixésima edición do circuíto de carreiras populares Larsa Corre connosco. A organización espera contar con algo máis de mil participantes na proba da tarde, aínda que o número de inscritos no circuíto xa supera os dous mil. As previsións de mal tempo e o coincidir con outros eventos poden marcar o número de participantes nunha cita que vai comezar ás 18.00 horas.
Ese será o momento no que tomen a saída todos aqueles que se atopan na categoría mini, que terán que afrontar un percorrido de 300 metros. Xa desde as 18.10 horas será a quenda para os deportistas na categoría sub-10 e sub-12, que teñen que percorrer un quilómetro. Os seguintes en tomar a saída van ser os das categorías sub-14 e sub-16, cun percorrido por diante de 1,5 quilómetros e que arrincarán desde as 18.20 horas. Finalmente, será a quenda para a proba de adultos, que está prevista para as 19.00 horas e na que todos os participantes teñen que afrontar 3.300 metros.
No que se refire ás características do percorrido, tanto os mini como o resto de categorías sen contar os adultos van afrontar unha volta á avenida de Ramón Ferreiro. A diferenza radica na proba de adultos, onde o que terán que facer é dar dúas voltas a un circuíto, que ademais de incluír a avenida de Ramón Ferreiro, tamén ten un paso por Rodríguez Mourelo ata a Praza de Avilés.
Unha das novidades na proba da avenida de Ramón Ferreiro deste ano ten que ver cun lixeiro cambio no percorrido, e é que o ano pasado decidiuse un pouco romper coa tradición e a liña de saída e a chegada, que estaban situadas na Praza Maior de Lugo agora vólvese ao pasado e todo o que ten que ver coa chegada e a meta estará situado en Ramón Ferreiro á altura da Praza do Horta do Seminario.
