Hai días que a cidade lucense non fala doutro nome. Ela é Adiaratou Iglesias, deportista paralímpica que esta semana se fixo con dúas medallas de prata (100 e 200 metros) no Mundial de atletismo paralímpico en Dubai. Logo dunha competición que retrata como "emocionante e incrible", este domingo chegaba a quenda de volver a casa.
Decenas de persoas esperábana na tarde deste domingo na estación de autobuses de Lugo, que se encheu de flores, pancartas e moitas ansias de poder abrazar á subcampioa do mundo. Entre eles o seu adestrador no Lucus Caixa Rural, Adolfo Vila, que comentaba que agora é cando se lle viña á mente aqueles días no verán nos que só quedaban el e Adiaratou adestrando. Sen dúbida o traballo duro foi fundamental para que a velocista do Lucus chegase ata alí.
O momento esperado chegou e a dobre medallista baixou do bus sorprendida ante semellante recibimento. "Non me esperaba nada disto, estou moi emocionada, non teño palabras". Saúdos e algunhas bágoas protagonizaron os primeiros minutos do reencontro. As emocións non acababan aí pois a atleta tiña unha cita en escasos minutos co partido do Lugo-Racing, onde faría o saque de honra.
A medallista, que non deixaba de recibir felicitacións, quixo recordar como fora a competición. "O obxectivo era coller unha medalla, non sabiamos que sensacións tiñamos porque non coñeciamos aos rivais e a tempada fora moi longa", explicou.
De cara ao futuro, Adiaratou teno claro: "primeiro tocará descansar un pouco e xa en nada me porei a adestrar de novo para poder conseguir medalla". E é que, como a súa nai explica, Adiaratou ten unha gran capacidade de concentrarse e traballar. O seu futuro inmediato pasa por compaxinar os seus estudos en bacharelato mentres continúa adestrando para chegar ao cen por cento aos Xogos. "O futuro está en Tokio 2020", deixou ver a velocista do Lucus.
A pesar dunha tempada máis longa do normal, Adiaratou volveu a demostrar que está feita doutra pasta e mencionou que a competición non lle pareceu extremadamente dura: "só os dous días que tiven que competir seguidos, pero en canto ao clima, por exemplo, non tiven problema".
A moza, que ten un trastorno de albinismo que lle fixo perder un oitenta por cento da súa capacidade visual, xa non só é un referente no mundo paralímpico. A súa gran actuación en Dubai convértena en toda unha promesa do atletismo absoluto. Ademais de subirse ao podio en 100 e 200 metros, a velocista do Lucus logrou a plusmarca galega absoluta no dobre hectómetro (24.58).
