Os afeccionados ao fútbol teñen este sábado unha cita inescusable co quiosco. O Progreso e FutbolinLugo publican unha guía de 96 páxinas no que se fai un exhaustivo repaso aos equipos lucenses que compiten en categoría autonómica, desde a Preferente ata a terceira categoría, ademais dos oito equipos que compiten na liga feminina.
A publicación inclúe unha análise de cada equipo e a ficha de todos os xogadores e xogadoras, coas súas fotografías incluídas nun detallado traballo do que poderán gozar os lectores deste diario.
A guía véndese xunto ao Progreso por un euro e estará nos quioscos desde mañá sábado, día 15 de setembro, ata o domingo día 23.
Sempre á beira do deporte provincial, este diario dá un paso máis coa publicación dunha guía fundamental para seguir a marcha dos equipos nunha tempada que se presenta apaixonante.
Castro, Foz, Sarriá, Ribadeo e Viveiro son os conxuntos que defenden o pavillón lucense na Autonómica Preferente, categoría na que aspiran a ter un oco a próxima campaña un bo número de conxuntos. Pero só dous conseguirano, o que invita a pensar nunha Primeira Autonómica emocionante ata as xornadas finais.
Algo similar ocorre coa Segunda Autonómica e coa Terceira, as categorías máis modestas, onde o fútbol é só fútbol. O de antes, o de verdade, o que emana das páxinas dunha publicación que mañá se pon á venda para o goce dos afeccionados da provincia.