O mando no marcador e no xogo. Durante estas primeiras catro xornadas na liga de Segunda División o Club Deportivo Lugo mostrouse como un conxunto con capacidade de chegada e remate á área rival, pero sobre todo arrinca cunha materia pendente: sempre comezou por detrás no marcador.
Coa excepción do encontro inaugural do campionato no estadio Ángel Carro co empate (0-0) ante o Estremadura, nos outros tres encontros, os lucenses sempre tiveron que convivir e sobreporse ao feito de empezar por detrás no tenteador.
"É algo que penaliza moito e sabiámolo. Todos os conxuntos empezan moi forte e apértanche, o equipo non tivo fortuna de comezar ben aínda que o grupo está convencido e seguro de que as cousas van cambiar. Seguro que ante o Fuenlabrada seremos nós quen nos poremos por diante no marcador", aseguraba a meta do conxunto branquivermello Alberto Varo ao finalizar o encontro do pasado fin de semana ante o Elxe no estadio Martínez Valero.
O equipo foi capaz de sobreporse en Oviedo e Elxe con dous goles postremeiros
Na segunda xornada da liga, o equipo logrou un empate en Oviedo nun empate que comezou por detrás e salvou un punto nos instantes finais cun gol de Cristian Herrera. Xa no encontro disputado a seguinte xornada, ante o Alcorcón no Ángel Carro, o Lugo volveu verse moi pronto, incluso cun 0-2 en contra. Aínda que reduciu diferenzas en dúas ocasións non foi capaz de salvar ningún punto e cedeu por un claro 2-4.
E o pasado fin de semana, o Lugo tamén tivo que sobreporse ao tanto inicial do veterano Nino para o Elxe. Tivo que ser Borja Domínguez o que rescatase un punto no tramo final do encontro.
Así, nesa reflexión que facía Varo, este insiste no feito de que o Lugo competiu ata o final nos dous partidos como visitante e evitou caer derrotado, pero non foi capaz de frear o clásico ímpeto dos conxuntos locais nos primeiros minutos do encontro.
A melloría na defensa e a concentración nos tramos iniciais aparecen como unha materia a aprobar
AO ÁNGEL CARRO
Curiosamente, na pretemporada o Lugo mediuse coa Ponferradina no Ángel Carro con motivo da presentación dos branquivermellos ante a súa afección. Naquela ocasión produciuse unha situación que se ha calcado varias veces na liga, e é que a Ponferradina foi quen se adiantou no marcador e o Lugo tivo que sobreporse e acabou empatando.
A melloría na defensa e a concentración nos tramos iniciais aparecen como unha materia a aprobar para saír da zona máis baixa da clasificación de Segunda División.