O Burela FSF fai oficial a renovación da moza vivariense Lara Balseiro

O Burela FSF Pescados Rubén fixo oficial o que El Progreso A Mariña anunciara hai xa varias semanas. A renovacion da vivariense Lara Balseiro é xa un feito confirmado que liga a moza mariñá por sétima campaña co club mariñán. Aos seus 23 anos, a xogadora estivo arroupada na firma do contrato polo presidente do club laranxa, Manuel Blanco, e polo fundador do principal patrocinador do club, a empresa Pescados Rubén, Rubén Blanco. Ambos os dous aplaudiron a renovación da futbolista "porque reúne mocidade e experiencia laranxa, ademais de ser da casa e de formarse aquí", comentaron os dirixentes.

Lara espera poder achegar máis axuda que na última tempada, na que estivo moi minguada por unha lesión, aínda que contribuíu aos títulos da Supercopa e da Liga. "Volvo con moita ilusión, con ganas de seguir mellorando e facer as cousas ben. Cando un deportista se lesiona e lle gusta tanto o que fai pásao un pouco mal, pero agora levo todo o verán centrada na recuperación e case estou ao cento por cento", asegurou a propia á laranxa, que espera deixar atrás os problemas de nocello que lle impediron participar con asiduidade nas rotacións de Lucas e Julio Delgado.

O Burela FSF atópase ante un verán difícil, no que está a ter moitos problemas para configurar o persoal e todo iso a pesar de ser o actual campión de Liga e de Supercopa, ademais de subcampión da Copa. Lara aposta pola esencia laranxa para seguir escribindo a historia do equipo. "Será moi complicado volver repetir a historia do ano pasado; é case inigualable e máis coa marcha de xogadoras importantes, pero seguro que o club seguirá apostando polo equipo feminino e conseguiremos ter un bloque competitivo para pelexar o máis arriba posible", sinala a xogadora, que non promete títulos, pero si "o de todos os anos, deixarnos a pel no Vista Alegre e esforzarnos ao máximo para que o equipo quede arriba", concluíu.

TERCEIRA RENOVACIÓN. Lara convértese na terceira xogadora que sela a súa continuidade co club laranxa para a próxima tempada. Só as brasileiras Jozi e Dany están comprometidas para continuar no equipo burelense, aínda que a directiva segue traballando para pechar o persoal canto antes e empezar a traballar a próxima semana.