Deporte Local Lugo
Arco: "Hai que volver canto antes, pero volver ben"
O Leite Río Breogán comezou este luns os adestramentos para preparar a tempada 2019-20, na que competirá na LEB Ouro. O conxunto lucense, despois de que a semana pasada completase as probas médicas para todos os integrantes do persoal, viviu as súas primeiras sensacións na pista do Pazo dos Deportes de Lugo.
Para comezar, o bloque de xogadores estivo formado por once xogadores. Alí estiveron Salva Arco, Christian Díaz, Sergi Quintela. Roope Ahonen, Mateo Sánchez, José Nogués, Thomas de Thaey, Massine Fall, Sandi Marcius e Rauno Nurger, aos que hai que engadir tamén ao mozo Gabriel Gómez, Este último hai que recordar que axudará ao conxunto durante a pretemporada e para cubrir calquera continxencia que poida aparecer.
Como xa estaba previsto, as ausencias no equipo lucense foron Mo Soluade e Dagoberto Pena, dous xogadores que teñen que atender a compromisos internacionais coas súas seleccións. Mo Soulade haberá que esperar a ver cando termina esa participación, do mesmo xeito que no caso de Dagoberto Peña, que está pendente de saber se participa ou non no Mundial de China que arranca a finais deste mes.
A primeira xornada de traballo comezou cunha charla técnica na que os xogadores coñeceron as primeiras impresións e ensinos do técnico Diego Epifanio, para despois empezar a tomar o contacto coa pista. Os xogadores sometéronse a diferentes probas e exercicios físicos, para logo empezar a tocar o balón e tomar o contacto coa pista do Pazo dos Deportes de Lugo para ver as súas sensacións na primeira xornada da pretemporada.
O equipo lucense terá unha primeira semana de traballo esixente na que hai que destacar que están previstas dobres sesións excepto mañá e o sábado. O equipo fará traballo físico e técnico, e ademais tamén terán momentos para o traballo táctico e asimilar eses conceptos que quere meter Diego Epifanio no seu equipo.
O primeiro partido amigable non chegará ata o día 31 deste mes, e será no Pazo ante o Benfica. Ata aí, xornadas para acumular moito traballo e coñecerse o mellor posible nunha pretemporada de seis semanas e coa mirada posta en chegar o mellor posible ao comezo da tempada na LEB Ouro. As primeiras impresións parecen realmente positivas, cun grupo bastante renovado, pero con xente con experiencia que leva ben o grupo. Todos tamén con ese interese por coñecer o que quere deles Diego Epifanio, un técnico que xa sabe o que é ascender, iso que desexa lograr o novo Breogán.
