O Cádiz, uns números que asustan

O Club Deportivo Lugo medirase o domingo (21.00 horas) no estadio Ramón de Carranza cun Cádiz, líder incuestionable de Segunda División e que asinou uns números espectaculares no que vai na actual competición.

O pasado fin de semana, o equipo adestrado por  Álvaro Cervera empatou a un no terreo do Tenerife e co punto que sumou chegou aos 36 e mantén os dez de vantaxe que tiña sobre o terceiro clasificado, o Almería, que agora adestra Guti.

Se se analizan as marcas do conxunto gaditano no que vai de tempada, o Cádiz pode presumir de que conseguiu un 75 por cento dos puntos en xogo ata agora, xa que gañou 36 e só hase deixar 12. O gaditano é, con diferenza, o equipo que acumula máis vitorias, once, tres máis que conxuntos como Fuenlabrada, Huesca e Albacete e é, xunto co Almería, o que menos derrotas sofre: só dous -nas visitas ao Alcorcón e Albacete-. Gañarlle por agora no Carranza é algo imposible.

Se en casa asustan, o Cádiz é, logo de dezaseis xornadas, o mellor visitante da liga con 17 puntos obtidos lonxe do seu estadio, dous máis que o Albacete. Desde logo, é o equipo local máis fiable con 19 puntos atrapados no seu feudo (mesmos que o Huesca).

OS GOLES. Se se pasa de analizar os puntos a mirar os goles, as cifras son máis que significativas. O Cádiz marcou no que vai de tempada 25 goles, un máis que o Rayo e dous por encima de Almería e Ponferradina. E é o menos goleado con 13 recibidos, a mesma cifra que encaixou o Huesca.

O conxunto que adestra Álvaro Cervera é, ademais, o que presenta un balance máis favorable entre goles marcados e en contra, cun saldo positivo de 12, cunha ampla marxe sobre os demais. O que máis se lle achega é o Almería cunha conta de oito (23-15), outro dos datos que axuda a entender por que é o líder con diferenza. Se se pasa dos goles aos refachos de resultados. aí o Cádiz tamén ten que moito que dicir. O conxunto gaditano encadea nove xornadas consecutivas á fronte da clasificación e un total de 13. Salvo nas xornadas primeira, sexta e sétima, nas que ocupou no segundo posto, os gaditanos só saben o que é mirar ao resto desde o máis alto. Os oito puntos de renda que dispón sobre o segundo (o Fuenlabrada) aseguran aos gaditanos a súa estancia no liderado polo menos dúas xornadas máis no peor dos casos. E os dez sobre o terceiro -Almería- e o cuarto -Huesca- garántenlle un mínimo de tres semanas como inquilino de prazas de ascenso directo. E os 12 puntos sobre o sétimo -Alcorcón, con 24- supoñen que non sairá da zona de play off nas próximas catro xornadas. Imos, chegará ao Nadal con bastante tranquilidade.

O Cádiz avantaxa en 11 puntos ao Albacete, 12 ao Xirona, 13 ao Zaragoza, 15 ao Rayo, 17 ás Palmas, 18 ao Spórting (o dobre de puntos), 21 ao Tenerife, Málaga e Oviedo e 26 ao pechacancelas Deportivo. Máis nada que dicir.