Ilusión e banco de probas. Gozar e aumentar unha moral maltreita tras un resultado adverso na liga. Apostar por un trofeo adxacente que permitirá observar a un dos equipos de moda na Primeira División ao mesmo tempo que se ofrecen minutos aos menos habituais. Eses serán os obxectivos do Lugo este martes (19.30 horas) ante o Levante na ida dos dezaseisavos de final da Copa do Rei, un lugar descoñecido para os branquivermellos no novo milenio.
A última vez que o Lugo enfrontara o seu escudo ao dun Primeira en competición oficial Felipe González aínda era presidente do Goberno en España. Naquel 4 de xaneiro de 1995 o Lugo recibiu ao Celta no Ángel Carro na terceira rolda do torneo do k.o. para gañar aos vigueses 2-1. A pesar de que a volta en Balaídos deixaría un 5-0 en contra, o partido disputado á beira do Miño é recordado por boa parte da bancada e pertence á colección de fitos do club.
Buscará o conxunto lucense repetir heroicidade este martes ante o Levante. Conseguir un triunfo suporía un impulso para todos. Primeiro para unha afección desconcertada pola marcha do equipo na liga e o naufraxio do proxecto de Javi López, destituído tras a derrota ante o Cádiz. Segundo para os futbolistas, aos que gañar aos granotas daríalles un impulso na confianza antes de afrontar un duelo decisivo este domingo (16.00 horas) en Reus. E terceiro para o propio club, ao que superar ao actual sétimo da táboa na máxima categoría do fútbol español.
Pero tamén será un partido útil para o novo adestrador, Alberto Monteagudo, que empregará os noventa minutos como banco de probas para a súa idea de xogo.
Sen Javi López no banco, os seguidores branquivermellos terán a primeira toma de contacto co novo técnico, que observará de primeira man aos xogadores con menos minutos e que poden ter un novo protagonismo co preparador manchego.
Ante o conxunto valenciano poderase ver o debuxo polo que aposta Monteagudo e as súas intencións sobre o céspede.
Tamén será clave a actitude do Levante. O preparador do conxunto granota, Paco López, avisou de que irán "competir e gañar cada partido co mellor que temos". O técnico asegurou que os seus xogadores irán "coa máxima ilusión" e "coa idea de gañar o encontro". "Ilusiónanos moitísimo a Copa do Rei e iso dános enerxía e querémolo transformar nun bo partido".
ONCE CON MENOS MINUTOS. O Lugo apostará por un once con futbolistas con menos minutos para que teñan ritmo de xogo e correr con menos riscos para os teóricos titulares de cara ao duelo de Reus.
Deste xeito, Alberto Varo estará baixo paus, con Bernardo Cruz e José Carlos no centro da zaga e Luis Ruiz no carril zurdo. Na dereita queda a dúbida do substituto de Campabadal, xa que non hai un especialista san para o lateral dereito. Guille Donoso, Iriome ou un central -Vieira ou Josete- completarán a defensa.
Por diante serán Ramón Azeez e Aburjania os encargados de dirixir a medular branquivermella e controlar a pelota. Desde a segunda liña entrarán un Antonio Campillo con gañas de recuperar o seu sitio no equipo e achegar pase e gol; Juan Muñiz, que porá a luva da súa perna esquerda ao servizo do equipo, e Cristian Herrera, que partirá desde a media punta.
Arriba, Jona Mejía e Escriche xogaranse un posto como dianteiros para reivindicar o seu olfacto de gol e disputar o posto a Dongou de cara ao domingo.
