O Rácing Vilalbés celebrará o próximo mes de maio o décimo aniversario do seu último ascenso a Terceira División, tras o que chegou a época de maior crecemento do club a todos os niveis. O aumento de equipos na canteira, a consolidación na categoría e a clasificación para dúas fases de ascenso a Segunda División B dan mostra do camiño percorrido. Un camiño que continúa desde o luns co inicio dunha nova etapa.
O primeiro equipo iniciou o luns a pretempada dunha campaña na que o obxectivo será novamente non pasar apuros para lograr a permanencia. Un adestramento suave serviu de primeira toma de contacto para as novas incorporacións, que non son poucas, e para volver atoparse co céspede, apenas cinco semanas logo de pechar a campaña anterior, ao finalizar o play off de ascenso tras quedar eliminado contra o Levante B.
Á fronte da sesión do luns estreouse Juan Peón, novo adestrador do conxunto do Rácing tras a marcha de Óscar Gilsanz, que estivo ao fronte do banco chairego nas catro últimas campañas. Por agora, xunto a el no corpo técnico só está confirmado Javier Ares, Viuski, como preparador de porteiros.
Á marcha de Gilsanz hai que sumar outras pezas importantes do equipo da campaña pasada como Villares, Sergio Arias, Antonio e Marcos Souto. Para suplilos chegan outras caras novas: o defensa Julio Camba, procedente do Viveiro; os centrocampistas Diego Rey, chegado do Compostela, e Edrosa, del Castro; e os dianteiros Juan de Dora, do Sofán, e Javi Ballesteros, do Laracha.
Si que continúan Pita, López, Xusto, Vérez, Buyo, Make, os xemelgos Javi e José Varela, Arón e Álex Pérez.
Ademais, David Pereiro, formado nas categorías inferiores do Vilalbés, regresou do Outeiro de Rei e os canteiráns terán tamén protagonismo na pretempada. O porteiro Duarte, os defensas Cabado, Charly e Cadenas e o mediocentro Hugo soben de xuvenil, mentres que Clemente e Moreda, aínda nesta categoría, adestrarán tamén co primeiro equipo, do mesmo xeito que outros xogadores que están a proba.
AMIGABLE. O Rácing Vilalbés iniciará este mércores contra o CD Lugo o seu calendario de partidos de preparación para a próxima tempada. Ambos os conxuntos enfrontaranse a partir das 19.30 horas en Guntín.
Peón estréase con cinco fichaxes e sete canteiráns farán a pretemporada
O encontro estaba previsto inicialmente que se disputase no estadio municipal de A Magdalena, pero os traballos que se están realizando no terreo de xogo obrigaron a cambiar de plans. Ademais, o resto de amigables programados nun principio víronse afectados por estas obras e haberá que recolocalos.
