Novidades de fin de ano

19/dic./19 - 20:23 Actualizado: 21/dic./19 - 16:01

Seguinte

A edición número 25 da San Silvestre, que se celebrará o día 31 de decembro nas inmediacións do Club Fluvial de Lugo, chega este ano 2019 cunha importante novidade. A organización decidiu recuperar un percorrido que atravesa a ponte romana, e que terá saída e chegada fronte ao edificio do Fluvial, en todas as categorías. O Fluvial aspira a alcanzar este ano os 1.000 participantes a xulgar polas inscricións rexistradas neste momento, unhas 300, tal como puxo de manifesto este mércores o secretario do Fluvial e responsable da sección de atletismo, Alejandro Cuadros. Xunto a el estiveron o presidente do Fluvial, Tito Valledor; o xefe do servizo de Deportes da Xunta en Lugo, Manuel Cadramón, ademais de representantes de varios dos patrocinadores, como Caixa Rural, Autoescuela Lucus e Caixabank, que se incorpora este ano como patrocinador principal.

A edición deste ano trae como principal novidade o percorrido polo ponte romana, co que se recupera o circuíto que había hai anos, e vén confirmar esta carreira non só como un reclamo deportivo, senón tamén turístico e patrimonial. Así o explicou o presidente do Fluvial, Tito Valledor, quen se mostrou confiado en que se poidan superar os mil participantes e mostrouse "encantado de organizar unha proba tan emblemática como esta ."

A inscrición está aberta na web de ChampionChip

A inscrición para a San Silvestre do Fluvial pódese realizar na páxina web da ChampionChip Norte previo pago de 7 euros, se se fai antes do 24 de decembro, e de 10 euros, en caso de tramitar a inscrición entre o 25 e o 27. A participación na carreira mini é gratuíta e a de benxamíns, alevíns, infantís e cadetes custa 2 euros.

Recollida de dorsais
A recollida de dorsais dos participantes na proba atlética poderase facer no propio club o día 30 de decembro, desde as 12.00 ás 14.00 horas e entre as 17.00 e as 20.00. Para os atletas residentes fóra de Lugo poderán recoller o dorsal o mesmo día da proba de 15.00 a 16.00 horas.

Premios
Os primeiros e segundos clasificados da xeral recibirán senllos xamóns, doados por Caixa Rural Galega, Restaurante Il Farabuto e Limpiezas San Froilán, e un trofeo.

PERCORRIDOS E HORARIOS. Este ano todas as categorías terán saída e chegada fronte ao edificio social do Fluvial. Para a categoría mini, cun percorrido duns 100 metros, a saída está fixada para as 16.45 horas; inmediatamente despois tomarán a saída os benxamíns e os alevíns, cunha distancia de 1.300 metros; e a de infantís e cadetes (2.300 metros). A última das carreiras, para as categorías xuvenil, junior, sénior e veteranos, comezará ás 17.30 para percorrer unha distancia de 7.300 metros.

A saída efectuarase fronte ao Fluvial para cruzar a ponte romana, seguir polo Pazo de Feiras ata cruzar a pasarela fronte á fábrica da Luz. O trazado continúa en dirección á ponte nova, Mera e de regreso, volver polo circuíto ecolóxico, para cruzar de novo a pasarela e a ponte romana, ata chegar á meta.