O piloto lucense Luís Vilariño tomará parte no rallye de Transilvania, que terá lugar os días 25 e 26 deste mes, unha proba que pertence o Tour European Rallye. Para Luís Vilariño será a oportunidade para seguir sumando puntos no campionato e tamén vivir unha experiencia distinta.
"Imos participar co Skoda Fabia R5, co que estamos a participar no campionato de España. Imos a unha especie de campionato de Europa e onde buscaremos estar nas primeiras posicións e chegar con opcións ao último rallye do TER que sería o de Antibes", comenta o piloto lucense.
Luís Vilariño terá tamén aquí o seu bautismo en probas internacionais. "Vai ser a primeira vez que compita fóra da Península Ibérica, temos un apoio importante desde a organización e levamos tempo traballando no tema loxístico e de licenzas. Imos transportar o coche por estrada desde o venres para chegar en tres ou catro días e xa estar o vindeiro mércores nos tests", manifestou.
O lucense está con moitas ganas por disputar unha proba cunha gran inscrición. "Teño moitas ganas de vivir unha experiencia nova, vainos a custar seguir un pouco as indicacións polo idioma e para movernos, iso é un pouco me xera máis curiosidade ou nerviosismo. Se o fan todos, tamén o poderemos facer nós. Para min é todo un aliciente o poder disputar unha cita internacional, xa que é algo no que estivemos traballando durante a longa pretemporada que tivemos. O rallye de Transilvania, que será a cita que pechará o certame romanés, conta nas últimas tempadas cunha lista de inscritos con pilotos de recoñecido nivel mundial. Pola nosa banda seremos os primeiros españois en disputar esta proba, así que imos intentar sumar o mellor resultado posible", dixo.
Finalmente, Luís Vilariño insiste en que é optimista para esta cita. "Chegamos con moitas ganas de facer un bo papel. Ata agora mantivemos unha boa progresión que esperamos seguir tendo. Nesta ocasión, á miña dereita, estará Alain Pena, un copiloto novo e con experiencia internacional, o que sempre é positivo, porque nos pode achegar outro punto de vista para seguir mellorando", concluíu.
