O pivote do club de baloncesto Breogán Henk Norel podería estrearse co conxunto galego o vindeiro domingo ante o Fuenlabrada despois dun longo período de baixa de seis meses por unha lesión de xeonllo que o obrigou a pasar por quirófano.
"Norel empezou a adestrar co equipo, é un xogador grande e o seu proceso vai lento pero vai. Imos ver se nos pode axudar. Todos temos que axudar", explicou este venres o seu adestrador, Tito Díaz, que asumiu as rendas do equipo galego esta semana tras a destitución de Natxo Lezkano.
Norel, un dos máis valorados da tempada pasada na ACB, tivo que someterse en setembro a unha artroscopia para solucionar as súas molestias no xeonllo.
Nun dos primeiros adestramentos da pretempada Norel sufriu un golpe forte nun rebote e resentiuse dos problemas que xa presentara na articulación afectada. Tras pasar unha primeira revisión médica en Vitoria, xurdiron dúas opcións: un tratamento conservador con infiltración ou unha artroscopia para limparlle dúas bolsas de graxa que lle debilitan o xeonllo.
Primeiro optouse pola infiltración, aínda que o club galego xa era consciente de que se o xeonllo non respondía tería que someterse a unha artroscopia e agora, seis meses despois de pasar polo quirófano, parece estar en condicións de reaparecer. O club galego dispón dunha praza para inscribilo tras a saída do norteamericano Elijah Millsap esta semana.