QUINCE PUNTOS de quince posibles. A Sarriana segue nun extraordinario momento de forma e resultados e este domingo impúxose por 2-1 ao Agolada, o que permite liderar a clasificación xunto ao As Pontes nun regreso de ilusión a Autonómica Preferente.
O conxunto que adestra Alberto López non tivo unha primeira metade cómoda pola disposición do rival, pero tras o descanso mellorou notablemente e puido ampliar as diferenzas no marcador. O máis importante é que a pesar de que a primeira parte non foi moi brillante, a Sarriana si que foi capaz de marcar dous tantos e despois mantivo moi ben o control do xogo ante un rival que apostou pola defensa de cinco xogadores e intentou aproveitar as súas armas para sorprender aos locais.
Diego Núñez, cos seus dous goles, foi o claro protagonista no conxunto local; e todo nun encontro no que a clasificación apuntaba a unha diferenza que non se viu no marcador nin na primeira metade, pero si tras o descanso.
Con 2-0 no marcador, a Sarriana soubo pechar o duelo e seguir cun inicio espectacular que invita a ser moi optimista polo cadro de persoal e o rendemento ofrecido ata o momento.
Outro dos encontros destacados da xornada era o derbi entre o Viveiro e o Foz, un duelo no que os dous equipos mariñáns necesitaban os puntos para saír da zona baixa e finalmente foi o equipo local en que marcou a lei no campo de Cantarrana.
Foi un partido que podería dicirse que viviu todo nos minutos iniciais, máis concretamente ata o minuto 18. Ata aí víronse tres goles, dous deles do Viveiro e ademais a expulsión de Ibán Gayol, unha acción que resultou determinante para a sorte do duelo e que dificultou as opcións de Foz de conseguir algo positivo.
Esa superioridade numérica fixo que na segunda metade as cousas fosen máis fáciles para os locais. A pesar de todo, ningún dos dous equipos estivo especialmente brillante e aínda teñen moito traballo por diante para saír dos postos máis complicados da clasificación.
Mentres, o Ribadeo non puido facerse cos tres puntos no seu partido ante o Xallas. Os mariñáns afrontaban o choque coas aspiracións de gañar para seguir entre os primeiros da clasificación e ao final quedaron cun pequeno desgusto aínda que seguen na zona nobre. O Ribadeo foi mellor que o seu rival, pero o Xallas aproveitou as súas accións de ataque para sacar un valioso punto nun duelo equilibrado por momentos e no que o Ribadeo si demostrou máis cosas que o seu rival, pero faltoulle acerto.
A representación de equipos da provincia pechouse co encontro que disputou o Castro ante o Atlético Arteixo no campo de Ponte dos Brozos. Foi un partido no que os chairegos non tiveron opcións e viron como xa nos primeiros minutos perdían por dous tantos.
O fráxil Castro, practicamente incapaz de pisar a área rival con perigo, encaixou a súa segunda derrota consecutiva e continúa sen coñecer a vitoria. A primeira parte foi un auténtico monólogo local e que se reflectiu no marcador.
O adestrador do Castro buscou a reacción coa entrada de Nico no descanso, pero o movemento non serviu para reverter a situación e é que o Arteixo tivo unha tarde bastante acertada en ataque e castigou ao Castro.
Colaboraron nesta información a Axencia Deportiva Galega, Miguel Albo e José Ángel Díaz.