Deporte Local Lugo
Olmos rescinde este luns o seu contrato co Río Breogán
Tras a marcha de Paco Olmos ao Burgos, a situación dos xogadores do Río Breogán representados pola súa axencia no Breogán podía xerar inquietude entre a afección. Con todo, ningún dos xogadores de Beobasket abandonará o club esta tempada, asegurou Moisés Cohen. "Por suposto que non sairá ningún. Estamos máis que implicados co proxecto do Breogán. Co limitado orzamento do club colocamos xogadores moi importantes", sinala.
O representante engadiu que "Musa xa decidiu quedar pero ademais é onde queremos que estea agás que veñan os Lakers ou o Barcelona. Os outros xogadores non teñen saída; cumprirán o seu contrato".
Cohen desvelou que nas últimas semanas "recibimos ofertas importantes por Bell-Haynes e nin sequera o comunicamos ao club. Non queremos que saia".
ÚLTIMO ADESTRAMENTO. Paco Olmos, que asinará este luns a súa marcha ao San Pablo Burgos, dirixiu o domingo no Pazo o seu último adestramento no Río Breogán. Olmos, que fichou o pasado verán tras o ascenso á liga Endesa polo equipo de Lugo e leva unha gran tempada (é quinto na táboa), fichará polo actual penúltimo clasificado.
A SAíDA. O CB Breogán e Paco Olmos rescinden este luns o contrato entre as dúas partes e o técnico valenciano asinará de inmediato co San Pablo Burgos. O equipo castelán consegue por fin o seu desexo de contar no seu banco con Olmos unha vez que acaba de despedir ao seu segundo adestrador no que vai de tempada, Salva Maldonado.
En palabras do seu axente, Moisés Cohen, en relación ao salario que lle ofrece Burgos, "non falamos de triplicar o que cobra en Lugo, falamos de moito máis".
