Natxo Lezkano: "Mereciamos unha vitoria deste prestixio. É un día importante"

O adestrador do Cafés Candelas Breogán, Natxo Lezkano, afirmou que o seu equipo merecía "unha vitoria deste prestixio", tras imporse na casa ao Real Madrid Baloncesto por 84-71. "Hoxe é un día non sei se dicir histórico pero si importante", reflexionou Lezkano, que engadiu: "Non todos os días un pode gañar ao campión da Euroliga", como fixeron os seus xogadores.

Se isto foi posible, proseguiu, é porque pasou "todo o que tiña que pasar" para que o seu equipo gañase, ademais de despregar un bo xogo, agresivo e con acerto. "Fixemos unha primeira parte boísima", declarou o técnico do Breogán, que xa contaba con encaixar durante o partido algún parcial claramente favorable ao conxunto branco.

Con todo, "fallaron moitos tiros", e iso posibilitou que o equipo galego encarase o último cuarto cunha ampla renda que lle permitiu levar a vitoria con solvencia. "Ao final apareceu a súa calidade e metéronnos o medo no corpo, pero a diferenza era tan grande que fixo que gañásemos sen problema", afirmou Lezkano despois dun encontro que o Breogán chegou a dominar por 26 puntos.

Na rolda de prensa posterior ao partido, celebrou que se rompeu a serie negativa de cinco derrotas consecutivas que viñan acumulando e trasladou a súa esperanza de que este momento poida servir de punto de inflexión para cambiar a tendencia do equipo.

No entanto, "para gañar a calquera equipo dun punto -precisou- temos que sufrir" e explicou que vitorias como esta serán contadas ao longo da tempada.

Finalmente, felicitou aos seus xogadores logo dunha vitoria coral fraguada no traballo colectivo. "Todo o mundo o fixo ben", concluíu.