Nafti: "Estou orgulloso co traballo dos mozos"

O técnico do Lugo, Mehdi Nafti, valorou a eliminación do conxunto branquivermello a Copa do Rei: "Creo que o equipo fixo un encontro moi serio. Respectouse o plan de partido. Intentamos ter un once competitivo durante os 120 minutos e dar oportunidades a xente que o necesitaba. Estou decepcionado pola derrota, por non seguir nesta bonita competición, pero orgulloso co traballo dos mozos, sobre todo dos que menos xogan. é unha mágoa non chegar, polo menos, aos penaltis", indicou.

O adestrador franco-tunisiano afirmou que á súa escuadra faltáronlle "pernas" para pechar o pase na prórroga: "Gustoume finalizar un par de contras cando o Xirona estaba envorcado. Djaló e Quindimil non podían máis, Escobar estaba tocado… No noso lado esquerdo, eles cheiraron sangue e fixéronnos dano con centros laterais. Oxalá tivese dous ou tres cambios máis", sinalou.

O corpo técnico, ademais, avogou por rotar e repartir esforzos ante a proximidade do próximo duelo ligueiro, o luns ante o Sabadell: "Protexemos a Venancio e a Campabadal, e optamos por darlle menos minutos a Manu Barreiro. Gerard Valentín e Chris Ramos repartíronse os tempos. Hugo Rama xogou 45 minutos, El Hacen unha horiña… Intentamos competir e non prexudicar o físico dos mozos de face ao partido de Liga".

Ademais, Nafti valorou o papel de os xogadores do Polvorín. "Se os poño é porque confío neles. Son mozos que adestran connosco. Quindimil e Escobar fixeron un gran encontro e Luís Castro deuno todo".