Máis de trescentos xogadores de todas as categorías. Probablemente 34 equipos para a inmediata tempada 2019-2020. Case corenta anos de actividade polas pistas do voleibol de toda España. E agora un patrocinador de pompa. Club Voleibol Emevé e Perfumerías Arenal, dúas institucións lucenses, cada unha desde o seu ámbito, únense para crecer xuntos. O acordo entre Arenal e Emevé deuse a coñecer este martes nun acto ao que asistiron Rafael Marzán, director xeral da empresa, e Bibí Bouza, presidenta do club deportivo, un referente dentro da canteira lucense.
"Comezamos agora unha andaina da man de Arenal. Esperamos que dure moitos anos. Empezamos unha andaina fundamental para este club, para seguir crecendo, para dar visibilidade ao voleibol, para dar visibilidade á cidade de Lugo, porque nós movémonos por todo o ámbito español", dixo Bouza, que considera que a axuda mutua entre as dúas entidades permitirá a ambas crecer. "Queremos que Arenal e Emevé crean unhas sinerxías que se axuden mutuamente. Arenal é unha empresa punteira e un referente en Lugo, como cremos que tamén o é o Emevé; espero non pecar de falta modestia", engadiu.
Queremos que Arenal e Emevé cren unhas sinerxías que se axuden mutuamente. Arenal é un referente en Lugo, como tamén o Emevé
Rafael Marzán considera positivo para Arenal chegar a este acordo co Emevé. O desexo mutuo é que a unión das dúas firmas sexa longa. Engadiu que Arenal sempre quixo entrar no mundo do deporte.
"Era o momento de entrar no deporte. Arenal ten como patrocinio directo o medio maratón de Lugo —organízao El Progreso— e colabora puntualmente con algúns clubs deportivos, aínda que ao nivel de agora co Emevé, de envorcarnos, chegamos agora. é un bo momento, por moitas cousas, polo impulso do deporte feminino... é un labor social para nós", dixo.
Era o momento de entrar no deporte, polo impulso do deporte feminino sobre todo
Bibí Bouza foi interpelada sobre o próximo comezo da tempada 2019-2020 para o equipo masculino, que milita na Superliga —máxima categoría nacional; debutará o 12 de outubro—, e o feminino, que o fai na Superliga 2, que arrincará o 5 de outubro. "Como presidenta, o que espero, e o que desexo, é que os mozos (equipo masculino) se manteñan na categoría e as mozas, que ascendan. Creo que imos polo bo camiño. O equipo masculino ten un persoal moi competitivo e o feminino vaino a dar todo e vainos a dar unha alegría", dixo.
Xunto a Bouza e Marzán asistiron as xogadoras do primeiro equipo feminino Ainara Burgo e Tea Andric e os do equipo masculino Chema Giménez e Felipe Hernández. En representación da canteira estiveron os irmáns Nair (alevín) Eric (benjamín) e Zaira Méndez (prevolei).
