O breoganista Dzanan Musa arrasou nas votacións populares para elixir ao MVP da liga Endesa. O bosníaco sumou 28.899 votos, polos 20.298 de Giorgi Shermadini (Lenovo Tenerife), segundo clasificado. Chima Moneke (Manresa) pecha o podio, pero a unha distancia considerable dos dous primeiros (4.388).
A votación popular non é definitiva para a concesión do premio, aínda que é unha parte igual de importante que as outras tres. O premio a mellor xogador da tempada conta con catro procesos de votación distintos, e cada un se contabiliza ao 25%.
Á marxe dos votos dos afeccionados, téñense en conta as votacións dos xogadores, dos adestradores e dos medios de comunicacion.
Musa, que logrou recuperarse a tempo da súa operación de garganta, poderá despedirse sobre a cancha da afección lucense, que quere devolver tamén ao bosníaco todo o agarimo que demostrou cara ao Breogán e cara á cidade ao longo de todo o ano.