Juan Muñiz, centrocampista asturiano do CD Lugo, advertiu este mércores da progresión do seu próximo rival, o Spórting de Xixón, desde o cambio de técnico que tivo. "O cambio de adestrador vese que foi para ben. Está a sumar moitos puntos e vése diferente: vai máis arriba, a por o partido no seu campo e fóra, é un equipo valente, que sempre sae a gañar", comentou en rolda de prensa.
Incidiu en que o Spórting "está moi ben" e é "un dos que máis en forma está da categoría no último mes".
Muñiz formouse no Spórting, co que debutou en Primeira División en 2010 con 18 anos. Por iso, recoñeceu que é unha cita "especial" para el, aínda que precisou que aínda o será "máis" no partido da segunda volta no Molinón. "Aínda que quedan poucos compañeiros daquela época, sempre é especial, hai xogadores cos que teño boa relación", apuntou.
Se estamos a bo nivel e facendo as cousas que se nos piden podemos levarnos os tres puntos
O Lugo gañou os dous últimos encontros como local e tratará de despedir o ano coa terceira vitoria consecutiva en casa tras empatar en Almería (1-1) un partido no que afrontou case unha hora en inferioridade. "A pesar de que non estamos a levar os puntos que nos merecemos tamén estamos nun bo momento e xogar en casa é un punto a favor que se ten que notar. Se estamos a bo nivel e facendo as cousas que se nos piden podemos levarnos os tres puntos", declarou.
Muñiz foi titular o pasado fin de semana pola lesión de Iriome González, do que dixo que xa está "ao cento por cento", polo que agora dependerá do seu adestrador darlle continuidade no once ou deixalo no banco.
