O adestrador do Lugo, Alberto Monteagudo, asegurou que o seu equipo "non terminou de axustar e perdía o balón rápido" ao principio do partido. Por iso "o primeiro gol caeu pronto e fixo bastante dano". "O segundo tanto chegou cando mellor estaba o bloque", asegurou. O preparador do conxunto branquivermello cre que teñen que "ser máis contundentes sen balón". Esta circunstancia está «a penalizar moito, sobre todo "fóra de casa".
Alberto Monteagudo falou sobre a revolución que expuxo no once: "Temos un plantel no que calquera pode xogar, tiñamos boa dinámica en casa pero escapóusenos o partido do Zaragoza e encaixamos moitos goles. Hai que mover cousas. Somos responsables todos pero había que mover un pouco á xente. Darlle aire fresco ao equipo".
Tamén falou das virtudes do Mallorca: "Viven moito da súa orde e a velocidade de Lago Júnior e as conducións de Dani Rodríguez. O bo que teñen fano ao 2000x1000. Non soubemos atallalo", sinalou.
O técnico falou sobre o seu posible futuro ás beiras do Miño: "Non temo polo meu posto. Temo pola alegría que transmitía o equipo cando cheguei. O que a min me matan son este tipo de partidos. Todo o contrario a ser alegres, ter ocasións e ser chisposos".
Ademais, pronunciouse sobre unha das carencias que observa no seu bloque: "Eu vin a este equipo antes de chegar. Con tres mediocentros temos control, pero non chegada. Hai que aprender do que nos pasa fóra de casa e recuperar o que eramos no Ángel Carro. Hai que solucionar o de fóra, onde encaixamos resultados avultados. Hai que dar un golpe de temón, estivemos horrorosos. Fáltanos clarividencia e hai que tocar o tema mental".