Monteagudo: "Debemos estar orgullosos"

O técnico do Lugo, Alberto Monteagudo, estaba abatido e desgustado tras o partido, pero orgulloso tamén polo rendemento do equipo. "Díxenlle aos xogadores que teñen que estar orgullosos, que necesitamos os puntos, pero non nos podemos deixar influenciar polos resultados. Melloramos moito, somos competitivos, traballamos moi ben esta semana e aplicámolo", apuntou Alberto Monteagudo, que ademais estaba moi desgustado coa arbitraxe. "Sinalaron un fóra de xogo cando partía do noso campo a Cristian Herrera, que quedaba só ante o porteiro. Houbo un penalti moi claro a Iriome, pero pitar aquí non é sinxelo. Non me gustou nada a arbitraxe, o seu xeito de levar o partido", apuntou.

Monteagudo destacou o esforzo do equipo e confiou que a caseta estaba abatida tras o pau dunha derrota inmerecida. "É complicado animar aos xogadores despois do partido que fixemos. Tivemos a Osasuna contra as cordas. Fixemos un moi bo partido, puidemos gañar, pero isto é un xogo de acertos e erros". O Osasuna atinou ao final nunha acción que puido estar mellor defendida. "Para min que non foi nin córner, pero é certo que esa última xogada é evitable, tiñamos que estar máis vivos para que o centro non fose tan limpo".

Tampouco ocultou que o Lugo se botou atrás nos últimos minutos de partido. "Claro que empezaba a valer porque eles son poderosos, metían centros laterais e tiñan xa sobre o campo a Xisco... Pero vin moitos partidos de Osasuna en casa e nunca adoitan xerar tan pouco como neste partido. Buscámoslles ben as costas á zaga tan adiantada que tiñan", valorou Monteagudo, satisfeito co ton do equipo durante o partido do Sadar.