sábado. 06.06.2020 |
El tiempo
sábado. 06.06.2020
El tiempo

Moctar El Hacen: brillar desde o berce

El Hacen avanza nun momento do partido do pasado domingo ante o Oviedo.VICTORIA RODRÍGUEZ
El Hacen avanza nun momento do partido do pasado domingo ante o Oviedo.VICTORIA RODRÍGUEZ
O futbolista do Lugo brillou con 16 anos no torneo de Alcudia, motivou unha denuncia do Levante ante a Fifa e é a perla do Valladolid

O corpo ergueito, a zancada longa, talento para aparecer como xurdido da nada, coa sorpresa sempre pegada ao seu ronsel. Moctar Sidi El Hacen sempre tivo algo especial. Unha especie de aura que o acompañou desde neno cada vez que entraba nun campo de fútbol, xa fose de terra, herba ou de calquera outra superficie. A súa presenza sempre chamou a atención. Daba igual o espazo e o tempo, en Segunda División ou nas rúas da súa cidade natal en Mauritania. Porque a luz que desprende hoxe vestido de branquivermello xa a tivo cando era un adolescente e saíu de África.

Esa incapacidade para pasar desapercibido foi unha máxima na súa incipiente traxectoria no fútbol profesional, onde alternou actuacións soberbias e unha carreira rápida cara á elite con algunha que outra polémica.

El Hacen gañouse un sitio no fútbol español sen cumprir os 17 anos. Nacido en Arafat —un suburbio da cidade de Nouakchott, a capital de Mauritania— o 31 de decembro de 1997, o actual centrocampista do Lugo desenvolveuse no club Concorde. O seu xogo permitiulle formar parte da selección mauritana sub-20 que acudiu ao torneo de Alcudia de fútbol basee en agosto de 2014. 

A súa presenza destacou na localidade mallorquina, onde chegou a anotar o cuarto gol no 4-0 sobre Indonesia, a única vitoria do combinado africano. Esa actuación chamou a atención de varios equipos, entre eles a Valencia e o Levante, pero Moctar decidiuse polo club ‘granota', onde formou parte do equipo xuvenil antes de integrarse na súa filial. Aí xogou tres campañas antes de debutar co primeiro equipo na 2017-2018, en Copa ante o Xirona o 28 de novembro de 2017. Ademais, disputou outros dous duelos de Liga ese mesmo ano, pero acabou por deixar o Levante polo Valladolid no verán de 2018 con polémica.

O seu pase ao Valladolid motivou unha denuncia do Levante ante a Fifa. A pesar de que o seu contrato acababa en xuño de 2018, o club de Orriols tiña unha opción de ampliación por dous anos máis en caso que o club levantinista pagase 2.000 euros. Con todo, El Hacen entendeu que non era válida e decidiu asinar en Valladolid.

El Hacen debutou en Primeira co Valladolid nun duelo ante o Xirona

A súa estancia no filial castelán foi un éxito, chegou a xogar un partido en Primeira co Valladolid —precisamente ante o Girona, contra o que debutara co Levante—, pero a súa presenza non estivo exenta de problemas. Ademais dalgúns atrasos nas incorporacións tras os seus compromisos internacionais, El Hacen cumpriu unha sanción de cinco partidos en abril de 2019. Foi tras a súa expulsión nun duelo no Plantío ante o Burgos por agarrar da pechera ao colexiado Alejandro Sánchez Alba no minuto 94.

O director deportivo valisoletano, Miguel Ángel Gómez, foi o seu principal valedor e chegou a dicir, o 15 de xaneiro, que «non entendo que haxa direccións deportivas de Segunda que non crean nel. Teño moita fe nel». Aí apareceu o Lugo para lograr a súa cesión e convertelo no seu home de moda para liderar a loita pola salvación.

Primeiro goleador do seu país na Copa África
Moctar Sidi El Hacen sempre terá o seu nome ligado á historia de Mauritania. O centrocampista foi o autor do primeiro tanto do seu país nunha Copa de África ao facer o 3-1 de penalti no minuto 70 do duelo ante Mali que acabou cun marcador de 4-1.
Fixo coa súa selección
Con Mauritania, El Hacen xogou 16 partidos e anotado dous tantos como internacional absoluto, o que lle converteu nun ídolo no seu país.

Moctar El Hacen: brillar desde o berce
comentarios