Satisfacción é a palabra que pode definir o balance que fai o atleta vivariense Adrián Ben da súa participación, o pasado fin de semana, nos 3.000 metros lisos do Gran Premio Internacional Cidade de Valencia. "Estou satisfeito. Baixei case en nove segundos a miña marca persoal (na distancia)", asegura o atleta mariñán, que parou o cronómetro nuns excelentes 7.55.75 minutos, a moi poucas centésimas de conseguir a mínima para o campionato de Europa nesta disciplina.
Xa en Madrid -Ben adéstrase no centro de alto rendemento Joaquín Blume tras unhas semanas facéndoo en Segovia pola neve que caeu sobre a capital-, o atleta mira o lado positivo da carreira que disputou o sábado. "A xente non o entende moi ben, porque me di que quedei o último, pero corrín contra a mellor xente de España, non podía haber outra carreira mellor", di. "E estar tan preto deles, que estiveron competindo, que teñen rodaxe, cando eu levo once meses sen competir está moi ben", engade. "Eles correron un segundo e medio máis rápido o quilómetro e levo moito tempo sen competir; é para estar contento", asegura.
Estar tan cerca do resto, cando eles teñen rodaxe e eu levo once meses sen competir, está moi ben
Adrián Ben, que destacou sempre nas probas de mediofondo, 800 e 1.500 metros, quixo empezar por correr un 3.000 porque, di, "é unha proba menos agresiva e como toma de contacto está moi ben". Agora xa ten a mente posta nas dúas próximas competicións, ambas en Barcelona: a Copa da Raíña, o próximo 6 de febreiro, onde correrá co FC Barcelona e, dous días despois, unha reunión internacional. En ambas as probas correrá o 1.500 metros.
O seu día a día pasa agora por adestrarse en Madrid "bastante, e bastante duro, de face a todas as competicións que veñen", advirte. "Olimpíadas, Europeo en pista cuberta e o que vaia xurdindo ao aire libre", di o mariñán, aínda que é consciente que dada a situación que hai coa pandemia "non se pode mirar máis aló dunha semana, e xa te estás aventurando bastante".
Veño dunha situación de estar bastante tempo parado e agora o que busco é ter continuidade
O obxectivo principal que ten Ben esta tempada son os Xogos de Tokio "pero non se acaba o mundo se non hai olimpíadas, xa as haberá máis adiante", advirte. "É verdade que é a proba máis importante que hai no atletismo, pero ata que non haxa unha declaración do Coi ou de Xapón sobre a súa suspensión eu seguirei adestrando para mellorar o meu posto no Mundial de Doha", di, onde fixo sexto en 800 metros.
Pero a incerteza pola disputa ou non das competicións pode facer madeixa na motivación dos atletas, aínda que non é o caso de Ben. "A min non me afecta", di. "Veño dunha situación de estar bastante tempo parado e agora busco continuidade. Non está na miña man que se celebren as competicións ou non e o que teño que facer é seguir adestrando", argumenta finalmente.
Moitos seguidores
O atleta de Viveiro ten case 4.000 seguidores en twitter, pero tamén deixa as súas mensaxes en Instagram, onde é bastante activo e comentou a súa carreira do sábado en Valencia.
