José Manuel Miragaya non seguirá como preparador físico do CB Breogán a próxima tempada, co que se pecha así unha relación de dez anos na que o preparador de Guitiriz foi o encargado do traballo físico dun equipo que agora xogará na liga ACB.
Á hora de explicar os motivos do seu adeus, Mirigaya foi claro e evidenciou que as diferenzas foron económicas. "Fixéronme unha oferta creo que a semana pasada e, desde o meu punto de vista, non chegamos a un acordo e non aceptei continuar. Era unha cuestión máis ben económica", sinalou.
O expreparador físico do Breogán profundou sobre a súa marcha do club e as circunstancias. "Isto é deporte profesional e é unha empresa, unha empresa fai unha oferta e un traballador acéptaa ou non. É un traballo que me gusta, o club cumpriu comigo e eu crecín no club e o club tamén creceu. Creo que abandono o club no seu mellor momento coa chegada á ACB, deume máis mágoa abandonalo sen ascender. Deume moita máis rabia habelo deixado na LEB Oro", comentou.
Miragaya insistiu en que sentiu valorado polo club e a afección. "Non podo dicir nada malo da afección do Breogán, temos unha afección exemplar, estivemos unha chea de anos en LEB e no club tamén estiven ben e sentinme valorado", dixo.
José Manuel Miragaya negou que o motivo da súa marcha fose o feito de non estar disposto a viaxar co equipo na ACB. "En absoluto. Eu estaba disposto a viaxar este ano, non hai desencontro para nada nese aspecto. Ademais, teño viaxado co club. Daba case por feito que tiña que viaxar este ano e non houbo maior problema porque incluso o club ofrecíame viaxar a certos partidos", manifestou.
Finalmente, o preparador guitiricense non ten claro o seu futuro e prefire tomalo con calma e esperar ao que poida chegar. "Ata setembro ou por aí non me vou a expor nada e non me saíu nada. Tamén creo que moita xente non sabía que non ía continuar e así non estás no mercado, por así dicilo. A xente dá por feito que vas seguir e non che chegan ofertas. Ata setembro voumo a tomar con calma, non é momento de tomar decisións apresuradas e si analizar e valorar o mercado laboral", indicou.
