O Club Deportivo Lugo mantén no que vai de tempada unha traxectoria realmente curiosa e é que o branquivermello é un dos conxuntos que mellores resultados consegue ante os equipos da zona alta da clasificación, mentres que os seus resultados ante os clubs da zona baixa deixan bastante que desexar.
O conxunto que adestra Eloy Jiménez é o sexto mellor equipo da competición cando se miran os seus resultados ante os seis mellores clasificados nestes momentos (Cádiz, Almería, Huesca, Fuenlabrada, Xirona e Zaragoza). Os branquivermellos conseguiron un botín de oito puntos na primeira volta ante eses equipos punteiros e chama a atención que unicamente o líder destacado, o Cádiz, foi capaz de vencer os branquivermellos (2-1).
O Lugo, por contra, foi capaz de vencer ao Huesca no estadio Ángel Carro (3-2) e ao Fuenlabrada (2-0), mentres que logrou valiosos empates a domicilio fronte a Almería (0-0) e Zaragoza (0-0). Agora haberá que ver se o equipo lucense é capaz de manter esa fiabilidade ante conxuntos que demostraron un enorme potencial, como o Xirona, e algún deles cun elevado límite salarial.
Por contra, cando ao Lugo lle toca medirse cos conxuntos que están inmersos na pelexa por non baixar de categoría as cousas cambian, e moito. Para empezar, os branquivermellos non foron capaces de gañar ningún deses encontros.
Os lucenses sacaron un total de catro puntos, todos logo de empates, e sufriron unha derrota. O Lugo igualou ante o Real Oviedo (1-1), o Rácing de Santander (1-1), o Estremadura (0-0) e o Deportivo (0-0); en tanto que perdeu co Tenerife por 1-4. Aí, aos lucenses quédalles medirse pronto co Málaga. Mirando os números do Lugo ante eses seis equipos que pechan a táboa, o conxunto que adestra Eloy Jiménez só supera ao Tenerife, que unicamente conseguiu un punto; o resto foron derrotas. En definitiva, o Lugo volve este domingo a vivir unha oportunidade de mostrar a súa mellor cara e resultado, e facelo ante o recentemente descendido Xirona.
O defensa recoñeceu que Stuani, máximo goleador da categoría, "marca as diferenzas" e afirmou que o equipo branquivermello intentará "facelo o mellor posible" para evitar que amplíe a súa conta realizadora, que está en 13 tantos logo de 18 partidos que se disputaron ata o momento.
Lateral esquerdo
José Carlos, que disputou 14 partidos, 13 deles como titular, reapareceu o pasado fin de semana no once de Eloy Jiménez ante o Deportivo (0-0) actuando como lateral esquerdo. "Pódome adaptar perfectamente a esa posición e estamos para o que necesite o adestrador e axudar o equipo no que poida", apuntou.
O defensa, que afronta a súa terceira tempada no Club Deportivo Lugo, indicou que se atopa "adaptado ao equipo e a cidade" e evitou falar do seu futuro máis aló do 30 de xuño, data en que conclúe o seu contrato. "É un tema que leva o meu representante e xa falarán con quen teña que falar cando sexa o momento", advertiu José Carlos.