Marko Lukovic, novo xogador do Río Breogán

É un á-pivote de 2,06 metros e 29 anos con experiencia na liga Endesa

Marko Lukovic. EP
photo_camera Marko Lukovic. EP

O Río Breogán chegou a un acordo para a incorporación do interior serbio Marko Lukovic. O xogador procede do KK Split croata onde promediou 13,4 puntos e 4,3 rebotes en 34 partidos na liga croata e 14,6 puntos e 4,7 rebotes en 26 encontros na liga Adriática.

Lukovic debutou como profesional no seu país en 2009 no Mega Vizura onde permaneceu ata 2014. Pasou polas primeiras ligas de Alemaña, Macedonia, Eslovenia e Francia, e conta con experiencia na liga Endesa, formando parte do UCAM Murcia na tempada 2017/18, e cunha breve etapa en BAXI Manresa na tempada 2018/19.

Marko Lukovic foi internacional en todas as categorías con Serbia, incluíndo a súa recente participación na fase de clasificación para o Eurobasket 2022 coa selección absoluta.

O Río Breogán destaca que "Lukovic é un catro móbil, rápido, con capacidade para xogar de fóra a dentro e cerca do aro, e con bos porcentaxes no tiro exterior, un 40% en triplos a pasada tempada, o que o converte nun xogador moi versátil".

Comentarios