A carreira popular Run Foz Run prepárase para dar o pistoletazo de saída este domingo día 12 para seguir sumando percorridos ao circuíto Tour Mariña, logo das carreiras xa realizadas en A Pontenova, Foz, Burela, Xove, Benquerencia e Viveiro.
A falta de dous días para o inicio da proba, a listaxe de corredores que participarán xa supera os 600, converténdose unha vez máis nunha das probas populares de maior calado na comarca mariñá. Esta competición, organizada polo club Ría de Foz, coa colaboración do Concello de Foz, está incluída no recoñecido circuíto Tour Mariña que promoven o Grupo El Progreso e a firma Championchip norte, que ademais exerce de cronometradora da proba.
A gran cantidade de visitantes que copan a cidade mariñá durante o verán é un aliciente máis para a demanda de participantes que ten esta proba. Este número de participantes provoca que nalgunhas categorías pechase xa a inscrición, algo pouco habitual. Un exemplo desta demanda son as categorías masculina e feminina dos máis pequenos, a de Pícaros, que xa non admite máis inscritos xa que conta con 50 apuntados en cada unha das súas modalidades, que era a cifra límite.
Tamén se están batendo marcas no número de inscritos na categoría absoluta, que xa supera os 300 apuntados e que encherá as arterias principais da vila mariñá dun gran colorido.
As actividades previas á celebración da proba arrincarán o sábado no colexio Martínez Otero, onde se celebrará a Feira do Corredor a partir das 18.00 horas, e completaranse cunha andaina solidaria, programada para as 19.00 horas e que se pechará coa presenza dun d.j.
Os pratos fortes da carreira chegarán a partir das 10.00 horas, cando se dará a saída á proba de pícaros, que serán os máis novos en participar (nacidos no 2011 e anos posteriores) e que percorrerán unha distancia de 150 metros. As seguintes carreiras en ir saíndo serán as de benjamines, que terán que realizar un percorrido de 800 metros; as de alevíns, con 1000 metros de traxecto; e as de infantís e cadetes que cubrirán un circuíto de 1.500 metros.
A saída para os participantes na proba absoluta terá lugar ao redor das 11.00 horas, cun trazado de sete quilómetros que arrincará desde o colexio Martínez Otero e desenvolverase polas principais vías da vila mariñá.
A recollida de dorsais realizarase o domingo de 9.00 a 10.00 horas, antes da saída da primeira categoría, a de pícaros.
A Run Foz Run é outra clara aposta do Progreso e Championchipnorte para fomentar o deporte na provincia e ofrecer a posibilidade de competir a calquera persoa que o desexe.
