O adestrador do CD Lugo, Luis César Sampedro, afirmou este xoves na véspera do partido ante o Elxe no Anxo Carro que espera un rival "con necesidade" porque o seu obxectivo é o ascenso a LaLiga Santander e está en metade de táboa.
"Creo que o Elxe non vai vir aquí con cinco defensas, que virá gañar porque quere xogar a promoción de ascenso e está a sete puntos, así que espero un equipo con necesidade porque quere ascender", comentou en rolda de prensa.
PARTIDO DE IDA. O técnico galego recordou que non lle serve de referencia o 0-3 que lle endosou ao Elxe na primeira volta do campionato e afirmou que o preparador do equipo rival, Alberto Toril, non debe ter "unha espiña cravada" daquel partido.
"Se marcas moito e encaixas pouco, estás arriba; se marcas moito e encaixas moito, estás no medio; e se marcas pouco e encaixas moito, estás abaixo. eles marcan moito e encaixan moito, así que están no medio"
"Non recordo nin a aliñación do Elxe nin a de Lugo ese día porque o que me preocupa é o recente. O Elxe no mercado de inverno cambiou varios elementos e aquilo era a xornada 4 da primeira volta, así que non ten que ver coa xornada 4 da segunda volta", opinou.
RIVAL. O equipo alacantino cumpre, segundo explicou o preparador do Lugo, unha das regras non escritas do fútbol no que se refire ao balance de goles a favor e en contra.
"Nisto do fútbol sempre é o mesmo: se marcas moito e encaixas pouco, estás arriba; se marcas moito e encaixas moito, estás no medio; e se marcas pouco e encaixas moito, estás abaixo. Eles marcan moito e encaixan moito, así que están no medio", comentou.
O LUGO, "MELLORANDO". Respecto do seu equipo, Luis César indicou que "non progresa quen non se equivoca" e asegurou que o CD Lugo vai "mellorando", á vez que restou transcendencia ao feito de que ante o Sevilla Atlético escapáseselle a vitoria nos últimos minutos (1-1).
"Hai que deixar atrás o que non suma. Simplemente hai que aprender, ter cero obsesións con esas cousas e seguir sumando", comentou.
O adestrador galego recoñeceu que está "contento" co rendemento e a traxectoria do equipo pero advertiu de que aínda é "unha obra incompleta".
