"Ante o Mirandés debemos pensar coma se fósemos os últimos"

O adestrador do CD Lugo, Luis César Sampedro, afirmou este venres que os seus xogadores deben afrontar o partido deste sábado ante o último clasificado de LaLiga 1|2|3, o Mirandés, coma se eles fosen os pechacancelas.

"Eles veñen a por todo, van xogar con moita intensidade e nós, igual que eles. Os pechacancelas temos que ser nós o sábado, pensar coma se fósemos pechacancelas. Cando chegas aos 10 últimos partidos xa se divisa o final do camiño, cada un ten os seus obxectivos e cada partido é unha batalla definitiva, a repercusión non é a mesma que hai tres meses", declarou en rolda de prensa.

O preparador branquivermello indicou que chegan "os partidos importantes, que gusta xogar" a todo o mundo porque "todo está aberto". "Os que fan ben os últimos partidos son os que teñen éxito", engadiu Luis César, que viu como o seu equipo se afastou da promoción de ascenso ao enlazar cinco partidos sen gañar.

"Este é un partido moi importante. A importancia dos partidos vai crecendo aos poucos, os de marzo son máis importantes que os de febreiro e os de abril serán máis importantes que os de agora", incidiu.

Do Mirandés, que pecha a táboa pero está a catro puntos das posicións de permanencia, declarou que conserva "o estilo e a formación" que tiña na "etapa de Carlos Terrazas" como adestrador, cun "esquema diferencial".

Para o encontro ante os burgaleses, Luis César perdeu por sanción a Carlos Hernández e a Carlos Pita, pero recuperou ao seu máximo goleador, Joselu Moreno, e agora terá que decidir se lle dá a titularidade ou se mantén no once ao arxentino Pablo Caballero, que se reencontrou co gol nas dúas últimas citas.

"En absoluto supón un quebradizo de cabeza para min. Estou a desexar que Caballero volva ser o Caballero que era. Agora está ben, non hai comparación a nivel físico co da primeira volta, xa dixen que necesitabamos os seus goles e estou encantado", resolveu.