Jean-Marc Bosman foi, quizais, un dos maiores revolucionarios do fútbol. O modesto xogador belga non pasou á historia polo seu fútbol senón por ser a orixe dun caso e unha sentenza que converteu, desde 1995, cada equipo de fútbol profesional nunha pequena representación da Onu. Non escapou a Segunda División española. Tampouco o Lugo, que chegou a converterse nun equipo plurinacional nesta década na categoría de prata do fútbol nacional. Nesa variedade de culturas, o peso do clan galego sempre foi importante no conxunto branquivermello, que o mantén esta tempada.
Púidose observar o pasado sábado en Cartaxena, cando ata seis futbolistas nacidos en Galicia chegaron a compartir céspede. Ese mesmo sexteto –Vieites, Hugo Rama, Alende, Pita, Seoane e Manu Barreiro– son os que xogaron ata o momento na liga. Ningún outro grupo de nacemento común alcanza esa cifra, tan só Cataluña teno con cinco homes, mentres que só hai un foráneo: Orest Lebedenko.
Este predominio dos futbolistas galegos foi unha constante no Lugo desde 2012. Tivo tempos mellores que o actual, como a pasada campaña, cando once futbolistas nacidos na comunidade vestiron a camiseta branquivermella na liga.
Esta foi a tendencia marcada nas catro primeiras campañas desde o retorno a Segunda. Na 2012-2013 e a 2014-2015 foron dez os futbolistas galegos que xogaron na liga co Lugo. Na 2013-2014 e a 2015-2016 o número achegouse á decena, xa que foron oito os branquivermellos de Galicia que loitaron pola permanencia.
A partir da 2015-2016 o número de galegos foi descendendo e incluso deixaron de ser os predominantes entre o crisol cultural do vestiario do Ángel
Esas campañas, xunto coa 2019-2020, Galicia tamén perdeu terreo na nómina de profesionais do Lugo con respecto aos xogadores nacidos fóra de España, que foron maioría.
A pasada campaña rompeu esa tendencia e o número de galegos no persoal creceu ata alcanzar o seu maior número ata o momento: once. Este número explícase, en boa parte, grazas á aposta de Juanfran pola canteira. Co valenciano debutaron Dani Vidal, Quindimil ou Antón
Na actualidade son sete os galegos que xogan de branquivermellos no Ángel Carro, unha cifra que pode aumentar.
Tarragona e Barcelona contan con dous futbolistas cada unha. Na primeira naceron os dous laterais dereitos da nómina branquivermella: Eduard Campabadal (nacido na capital provincial) e Ricard Sánchez, con orixe en Sant Jaume dels Domenys. Da segunda proceden Josep Señé, quen naceu en Terrassa, e Jaume Cuéllar, orixinal de Granollers.
Gerard Valentín, nacido en Avinyonet de Puigventós, é o único do quinteto nacido en Xirona. A representación catalá foi crecendo co paso das tempadas. Case inapreciable ao comezo desta segunda etapa na categoría de prata, incrementouse desde a tempada 2016-2017.
Andalucía, outra gran comunidade no Lugo
A representación andaluza foi, xunto coa galega, a máis representativa dos xogadores españois. Destacan as campañas 2015-2016 (5), 2016-2017 (5) e 2018-2019 (5), pero, por encima de todas, a 2017-2018, cando foi, con seis, a máis numerosa no Lugo.
