O Lugo e o Peluquería Mixta Friol decidiron non renovar o seu convenio de filialidade, o que separará os camiños de dúas entidades que foron da man a tempada pasada para conseguir o ascenso á Primeira B Nacional, a Segunda División do fútbol feminino español. As desavinzas en canto ao diñeiro achegado polo Lugo ao conxunto friolense foron a razón do desacordo.
O convenio asinado a anterior tempada entre ambas as entidades levou a achega do club branquivermello de 60.000 euros, máis facerse cargo do custo dos tres adestradores do primeiro plantel do Friol, toda a roupa do conxunto friolense e o tratamento de fisioterapia por parte dos profesionais do Lugo ás xogadoras, ademais da utilización do Ángel Carro en varios partidos.
Unha vez que se confirmou a permanencia do Lugo na Segunda División, ambos os clubs sentaron esta semana para discutir os termos dunha renovación que ambos querían, pero non ao mesmo prezo. O club lucense tan só podía chegar aos 20.000 euros máis conservar o resto de condicións. A razón da entidade que preside Tino Saqués foi que non dispuña da mesma cantidade de ingresos de televisión polo posto na clasificación da tempada pasada máis os gastos que se verán incrementados por diferentes conceptos.
O Friol esperaba, polo menos a mesma cantidade. Manter o contrato de filialidade suporía ter os patrocinadores principais do Lugo na camiseta, máis as súas cores e o seu escudo, pero con 40.000 euros menos, o que impedía ao Friol ter novos patrocinios nunha categoría que será retransmitida por televisións en aberto e de pago e a través de internet.
"Este ano ofrecéronme 20.000 euros e a roupa, non entraban nin os adestradores nin os fisios e eu díxenlles que por iso non, porque me quedaba atado a levar todo iso por toda España cando o club necesitaba unha axuda superior ou similar aos 60.000 euros. Todos entendemos a situación do Lugo, podiamos sentarnos e falar, pero se che ofrecen 40.000 euros menos... Isto é unha invitación a que me marche", asegurou Ángel Villar, presidente do Peluquería Mixta Friol.
Villar rexeitou de plano que o Lugo lle pedise que o Friol se incluíse dentro do seu control e da súa estrutura.
Este equipo terá as cores, o escudo e os patrocinadores do Lugo e terá que escalar desde a Segunda Autonómica outras dúas categorías —Primeira Galega e Preferente— antes de poder xogar na Primeira B Nacional, lugar ao que logrou ascender e no que xogará actualmente o Friol.
Para poder saír a competir en Segunda Autonómica, o Lugo debe confeccionar un plantel desde cero. Ademais de realizar probas para poder captar novas futbolistas que se incorporen ao proxecto, o club branquivermello asinou un convenio de colaboración coa SCD Milagrosa, que lle podería ceder xogadoras para poder xogar a próxima campaña.
Este acordo conlevará que o club milagrosista desenvolva unha base de futbolistas grazas á súa boa canteira co apoio do Lugo, que achegará equipamentos de roupa e de campos, apoio técnico e loxístico e ofrecerá unha saída aos novos talentos moldeados desde Frigsa no fútbol sénior do club do Ángel Carro.
O Milagrosa non terá que modificar nin a súa identidade nin os seus patrocinadores, xa que competirá coas súas cores, escudo e espónsors, ademais de funcionar de forma autónoma á hora de formar xogadoras.
O que aínda non determinou o Lugo e se creará un departamento específico para o fútbol feminino ou dependerá doutros existentes dentro do organigrama do club.
Esta campaña xogarán ante rivais como o Bilbao Athlétic, o Alavés, o Éibar, o Osasuna, o Zaragoza, o Barcelona B, o Rácing de Santander, o Zaragoza, o Atlético B, o Valladolid ou o Oviedo.
"O ano pasado entre o orzamento que tiñamos máis a axuda do Lugo foise aos 120.000 euros. Este ano nós calculamos un mínimo de 200.000 euros, pero para facelo comodamente sería un mínimo de 210.000, pero se podería facer por 200.000 ou 190.000. As viaxes á zona de Cataluña son unha boa mordida", dixo Ángel Villar.
Buscar novos patrocinadores que axuden a financiar o proxecto é o gran reto do mandatario friolense, xa que o diñeiro que recibirá polos dereitos de televisión non se percibirá ata o ano que vén e dependerá de distintos criterios. "Vai influír o posto no que quedes, obrigan a ter catro xogadoras profesionais, que teñas canteirás menores de 21 anos e que leven no club polo menos tres anos, e tamén o criterio dos partidos que che televisen. O ingreso importante chegará a final de ano", informou Villar.
O PM Friol, que manterá á súa filial en Primeira Autonómica, ten xa o seu primeiro plantel perfilado con 18 xogadoras e só lle quedan "dúas ou tres fichaxes". "Xa está pechado o adestrador e só faltaría un preparador físico", declarou Ángel Villar, quen confía en que o fútbol feminino de Lugo siga moito tempo na elite.
