O Lugo igualou este domingo a súa marca de expulsións nunha tempada en Segunda División e quedan aínda dezaseis xornadas por disputar en LaLiga SmartBank.
Hugo Rama viu o cartón vermello por dobre amarela no partido ante o Logroñés (1-1) no Ángel Carro. Vinte minutos separaron ambos os cartóns ao centrocampista, que se incorporou ao encontro tras o descanso.
O seu técnico, Mehdi Nafti, pretendía evitar coa súa entrada e a de Xavi Torres que Carlos Pita e Juanpe Jiménez visen a vermella por dúas amoestacións tras recibir amarela no primeiro período, pero, curiosamente, esas permutas non o libraron de acabar o partido con dez xogadores.
Foi a segunda expulsión de Hugo Rama no que vai de tempada, o único que tivo que irse dúas veces antes de tempo ao vestiario por decisión arbitral este curso no equipo branquivermello.
Tamén foron expulsados Eduard Campabadal, Marcelo Djaló, Xavi Torres, José Ángel Carrillo, Manu Barreiro e Carlos Pita.
Só chegou a oito expulsións noutras dúas ocasións na categoría de prata: o curso pasado e no 2015/16, pero en 42 xornadas, dezaseis máis que as que transcorreron esta campaña.
Quedou en sete expulsións na tempada 2014/15; en cinco, nas campañas 2018/19, 2017/18 e 2012/13; e en tres nos cursos 2016/17, a 2013/14 e 1991/92.
Únicamente tres xogadores chegaron ás dúas expulsións nunha mesma tempada co Lugo en Segunda, como Hugo Rama este curso: Pablo Cendrós e Diego Seoane na campaña 2015/16 e Víctor Marco na 2013/14
