O CD Lugo cedeu 16 puntos en partidos nos que tiña vantaxe no marcador, como o do pasado sábado ante o Zaragoza, que o derrotou (1-2) despois de terlle dado a volta ao gol de penalti que marcara Carlos Pita na primeira metade do encontro.
No choque cos maños, os branquivermellos, que non perdían na casa desde o 10 de novembro, desequilibraron o marcador co sétimo gol do seu capitán, e o Zaragoza, que fallou unha pena máxima e mandou dous balóns ao poste, atopou o acerto na última media hora de partido para sumar os tres puntos.
Hai menos dun mes, ante o Málaga na Rosaleda, o Lugo adiantouse aos oito minutos cun tanto de Josete Malagón, pero na segunda parte os andaluces déronlle a volta cos goles de Adrián e Harper (2-1).
Unha xornada antes, ante o Estremadura no Ángel Carro, os lucenses puxéronse por diante grazas a un temperán tanto de Carlos Pita, pero os estremeños neutralizárono con outro de Kike Márquez (1-1).
No undécimo partido do curso, ante o Cádiz, outra diana de Pita desde o punto de penalti serviu aos branquivermellos para porse con vantaxe nun partido que os gaditanos voltearon cos goles de Vallejo e Jairo (1-2).
No Ángel Carro tamén voaron dous puntos ante o Mallorca na sétima xornada do curso (1-1) despois de que Pita puxese por diante ao seu equipo, xa que os baleares empataron cun gol de Gámez ao bordo do descanso.
As remontadas ao Lugo comezaron na primeira xornada, cando o Málaga levou os tres puntos do Ángel Carro nun partido que perdía 1-0 a falta de cinco minutos e que remontou cos goles de Juankar e N'Diaye.
