A xogadora do Peluquería Mixta Friol Lucía Pardo, natural de Outeiro de Rei e de 19 anos, foi convocada para unhas xornadas de concentración coa selección española feminina promesas, de nova creación e que se sitúa entre as sub-19 e a absoluta, que terá lugar entre os días 5 e 7 do mes de novembro na Cidade do Fútbol das Rozas (Madrid).
Lucía Pardo levou toda unha sorpresa con esa convocatoria e aínda está pendente de coñecer detalles sobre a mesma. "Viña no coche logo das clases e lin unha mensaxe que mandaron polo grupo do Friol no que me estaban felicitando, así é como me decatei. Non o esperaba para nada. Aínda non me comunicaron nada sobre os plans, soamente sei que se trata dunha concentración en Madrid entre os días 5 e 7 de novembro", comentou.
Lucía Pardo recoñece que está realmente feliz por esta convocatoria para unhas xornadas de adestramento coa selección, todo nunha campaña importante para ela e para o club, que milita na segunda categoría do fútbol nacional despois do ascenso logrado na pasada campaña. "É un orgullo como lucense, non mo esperaba e por iso aínda estou a asimilar a noticia. Todo chega nunha tempada importante, estamos nunha categoría nova e chega agora un reto ilusionante", comenta.
"Toca gozar ao máximo porque vou estar rodeada de xogadoras moi boas, é todo un orgullo para min", di Lucía Pardo
A xogadora do Peluquería Mixta Friol si que ten moi claro que está ante unha oportunidade que hai que aproveitar e gozar, ademais nunha convocatoria na que se trata da única xogadora de Primeira División B que está en dita lista.
"Toca gozar ao máximo porque ao final vou estar rodeada de xogadoras moi boas e dalo todo", á vez que tamén se define como xogadora. "Son unha xogadora potente, peleona e que o dá todo nos encontros", sinala.
Lucía Pardo recorda tamén como foron os seus inicios neste deporte. "Estiven primeiro na Milagrosa, primeiro nas categorías inferiores ata chegar ao sénior, e logo xa asinei polo Friol e aquí logo duns anos. Agora cada ano que pasa atópome mellor, máis cómoda, xa coma se fose a miña casa", di.
A xogadora de Outeiro de Rei tamén aproveitou para valorar a situación deportiva do seu equipo nestas primeiras xornadas dentro da Segunda División e cales son as súas sensacións. "Podían ser mellores porque fóra de casa non puntuamos aínda, pero creo que o podemos facer mellor, conseguir mellores resultados e xogar como o facemos en casa", manifesta.
Finalmente, Lucía Pardo tamén agradeceu as mensaxes de felicitación que lle chegaron nunha xornada que non vai esquecer xamais na súa carreira deportiva. "Acordáronse moitos adestradores de hai anos, a familia, a verdade é que estou realmente contenta e moi agradecida a toda a xente", concluíu.
