Cambio de cromos no lateral. O Lugo incorporará ao deportivista Diego Seoane (Ourense, 1988, 1,81 metros) ata final de tempada, mentres que o carrileiro zurdo sevillano Samuel de los Reyes viaxará de camiño a Llagostera para xogar no equipo xerundense.
Os rumores que situaban ao zurdo cedido polo Córdoba fóra da cidade amurallada frutificaron este martes e é previsible que sexa anunciado polo conxunto catalán ao longo deste mércores. No seu lugar aterra á beira do Miño un futbolista de calidade, que foi titular gran parte da pasada campaña no Deportivo e que destaca pola súa polivalencia.
A chegada de Seoane será en forma de cesión por parte do conxunto branquiazul. Foi un futbolista crave para o éxito do conxunto coruñés a pasada campaña, na que xogou 24 partidos, dos que 21 foron como titular. Pero esta tempada non disputou nin un só minuto na primeira volta. Pouco máis xogou en Lugo Samuel de los Reyes: a súa achega limitouse a dous partidos de Liga e outros tantos de Copa.
