O Leche Río Breogán despedirá o ano este mércores (19.00 horas) no Pazo dos Deportes de Lugo, recibindo o Liberbank Oviedo, en partido correspondente á primeira xornada da segunda volta.
Ambos os conxuntos chegan con distintas sensacións. Mentres os locais encadean cinco derrotas, o conxunto que dirixe Natxo Lezkano faino despois de sufrir dúas dolorosas derrotas. Hai xustamente unha semana non foron capaces de competir en Cáceres (88-72) e o pasado fin de semana foron incapaces de sorprender en propia cancha a un dos favoritos, o Leyma Coruña, a pesar de que tiveron o triunfo na man. Os asturianos desperdiciaron os sete puntos de diferenza que tiñan (53-60) a falta de 51 segundos para acabar perdendo por (62-60).
Non é fácil repoñerse dunha contrariedade semellante e este sería o principal traballo de Lezkano durante esta semana. De todos os xeitos, e desde a óptica do Breogán, o que se debe de valorar é que os astures estiveron a piques de derrotar os de Sergio García e que de feito, conseguiron vencer outro dos favoritos como o Valladolid (83-78).
O Oviedo contará con Saúl Blanco, Kabasele e Oluyitan, que non xogaron en Pumarín
A domicilio, o Oviedo só disputou ata agora tres encontros que resolveu cunha vitoria, en Ourense (69-82) e dúas derrotas as xa citadas de Cáceres e A Coruña.
No partido da primeira volta, o Leche Río Breogán impúxose no Polideportivo do Pumarín (64-78), nun partido que se decidiu no último cuarto no que os lucenses lograron un parcial de (9-27). Naquel encontro non xogou Salva Arco por parte dos breoganistas mentres que por parte do Oviedo este mércores estarán tres xogadores que non o fixeron na primeira volta, Saúl Blanco, Hervé Kabasele e Cameron Oluyitan.
O rival do Breogán ten na irregularidade a súa principal característica. É un equipo perigoso no rebote ofensivo, en gran medida pola potencia física de Kabasele e de Norelia.
Un detalle que tamén pode explicar os altibaixos, incluso no mesmo encontro, do Oviedo está en que mentres son o peor equipo do grupo en porcentaxe de tiros de dous puntos (48,4%), son os máis certeiros (41,8%) nos tiros de tres puntos, onde Elijah Brown (quinto anotador do grupo A), Micah Speight e Harold Frey son as súas principais referencias.
Outros xogadores do cadro breoganista tamén destacan en distintos apartados estatísticos. Iván Cruz e Mindaugas Kacinas son, respectivamente, o primeiro e segundo mellores reboteadores defensivos. O madrileño é tamén o terceiro en rebotes totais. En tiros de dous puntos Kacinas é o xogador máis fiable do grupo (22/24) e o segundo Sergi Quintela (22/30).