Pablo Laso, adestrador do Real Madrid, comentou que tiñan "unha semana importante antes de Nadal con catro compromisos difíciles", e resaltou que "Lugo é unha cidade moi de baloncesto, que sempre tivo un equipo de nivel".
"Hai moito ambiente. Lugo é unha cidade moi de baloncesto, que sempre tivo un equipo de nivel. Pasaron unhas tempadas na LEB, pero a xente aperta moito e están a gozar do retorno do seu equipo á ACB. É un equipo con bos xogadores, con experiencia e obrigaranos a facer un bo partido se queremos a vitoria", dixo Laso en declaracións facilitadas polo club.
Laso, como todos os adestradores, non ve partido ningún sinxelo por moi abaixo que estea o rival na clasificación. "É un partido difícil, os equipos contra nós motívanse moito porque é unha oportunidade para eles e temos que mentalizarnos de que é unha semana importante antes de Nadal con catro compromisos difíciles", dixo.
"O equipo está concienciado e sabemos que temos un partido difícil. Estamos obrigados a facer un bo traballo. Se nós estamos sólidos defensivamente eles van sufrir máis que se lles deixamos a iniciativa", observou.
Sobre o rival, o técnico madridista afirmou que "Cvetkovic está a xogar moi ben de base, os aleiros teñen moita rotación con Redivo, Löfberg e Arco. Falamos dun equipo moi completo que ten de todo, e no seu primeiro ano na liga está a comportarse moi ben. Obríganos a facer un grande esforzo". "Cada partido é importante, cada día e cada adestramento. O do xoves foi unha boa vitoria contra un gran rival no Clásico e cun gran ambiente no Palacio, que nos axudou moito, pero isto segue e debemos entender que aínda queda moitísima tempada por diante", engadiu.
O equipo viaxará a Lugo sen Gustavo Ayón, Rudy Fernández, Anthony Randolph e Facu Campazzo e coa alta de Ognjen Kuzmic. "Sería moi precipitado pensar que Kuzmic está ben, pero se me ouve mataríame, como digo sempre, porque se adestrou moi ben estas dúas semanas, aínda que el mesma nota a falta de ritmo e é normal. É un xogador que necesitamos que estea pronto e que el atope as sensacións. Canto antes o teñamos, mellor", finalizou Pablo Laso.
