Abandonar o ostracismo, saír do fondo do banco, acumular minutos e sumar para o equipo á espera de atopar un refacho que o catapulte a ser a referencia ofensiva do Lugo. José Luís Moreno, Joselu, estivo a pasada semana no once titular dous partidos seguidos, algo que non vivía desde xullo de 2020. Un ano e catro meses despois, o onubense volveu repetir nun equipo inicial.
Desde a súa primeira tempada no Tenerife non repetía de inicio Joselu. Fíxoo catro xornadas seguidas, entre a 37 e a 40 da campaña 2019-2020. Con Baralla no banco, o andaluz foi fixo nos onces desde a súa chegada ao conxunto chicharrero en xaneiro de 2020. O seu papel na illa foi importante co preparador valisoletano, xa que, entre a xornada 25 –disputada o 25 de xaneiro– e a 42, só deixou de ser titular en tres partidos. Nesa metade de curso anotou dous tantos.
A segunda tempada no Heliodoro Rodríguez López apenas contou para Fran Fernández primeiro e para Ramis despois. Non repetiu na once inicial en ningún duelo dunha campaña con só catro titularidades para el, unha máis da que gozou nas doce xornadas co Lugo.
Coa súa aterraxe no Ángel Carro este verán –cedido polo club canario– o futbolista buscaba afianzarse como un dos importantes de Rubén Albés, mentres que o Lugo quería recuperar ao goleador que foi pichichi na 2016-2017 no estadio do Miño grazas aos seus 23 tantos.
Iniciou a campaña cun gol de penalti –o único logrado ata o momento– no Carlos Tartiere e foi titular na terceira xornada ante o Valladolid en casa, na que errou unha pena máxima.
Desde aquel encontro só xogou 26 minutos saíndo desde o banco ante o Fuenlabrada e o Huesca. A ausencia de Manu Barreiro ante a UD As Palmas e a necesidade de rotacións recuperárono para a titularidade na punta do ataque, mentres que repetiu, xunto a Carrillo, en Málaga. Na Rosaleda fíxoo deitado a unha banda e tamén como referencia arriba, aínda que, como ante o cadro canario, sen dispor de oportunidades de gol.
Ata o momento, o balance de Joselu nos 7 partidos e os seus 298 minutos é dun tanto anotado, catro remates a porta, dos que dous foron entre os tres paus, 43 pases dados, ningunha asistencia, 13 recuperacións e 23 perdas.
