Un adestrador que logrou a solidez dun equipo sen apenas derrotas como antídoto ante un rival que ten por costume a suma ante o Lugo. Eloy Jiménez e a súa capacidade para evitar tropezóns no conxunto branquivermello medirase -este domingo (18.00 horas)- por primeira vez como preparador do club da cidade amurallada ao Alcorcón, un club que ten unha marca case envexable fronte ao club do Ángel Carro.
O técnico de Hellín logrou construír un grupo marcado pola competitividade e a fortaleza. O Lugo de Jiménez só dobregou o xeonllo en dúas ocasións, das cales só unha foi en partido oficial.
Dos quince partidos dirixidos por Eloy Jiménez, o conxunto lucense caeu ante a UD As Palmas. Aquel 4-1 no Estadio de Gran Canaria o 20 de abril foi a última derrota lucense na liga. Catro meses despois só o Celta, nun amigable no campo de Baltar, en Portonovo, foi capaz de dobregar (3-0) aos pupilos do manchego.
En competición oficial, o Lugo converteuse nun rival complexo, moi competitivo e cunha alta capacidade para anular aos seus adversarios. Dos nove duelos ligueiros xogados baixo o mando de Eloy Jiménez, só o primeiro -o 4-1 encaixado ante a UD As Palmas- e o último -o deste pasado fin de semana no Tartiere fronte ao Oviedo (1-1)- comezounos o Lugo por detrás no marcador.
Os seis amigables disputados esta pretemporada tamén mostraron datos parecidos, xa que o cadro branquivermello caeu fronte ao Celta, mentres que igualou ante a Ponferradina (1-1) e Oviedo (1-1) e gañou ao Avilés (5-0), Compostela (1-0) e Real Madrid Castela (2-0). Deses duelos, só o conxunto vigués e o berciano dominaron no marcador ao Lugo.
Este domingo Eloy Jiménez terá unha proba de lume para o seu bo traballo. O Alcorcón é un dos clubs que máis puntos sacou fronte ao Lugo.
Os oleiros saíron vitoriosos ata en oito ocasións -catro delas no Ángel Carro- por tres empates e tres triunfos lucenses.
Custoulle aos do Ángel Carro puntuar contra os madrileños, xa que os cinco primeiros partidos disputados ante eles foron derrotas. A primeira vitoria foi na campaña 2016-2017, cando se impuxeron por 1-0 en casa cun tanto de Pedraza na última xornada da primeira volta.
Francisco Rodríguez foi o mellor técnico ante o Alcorcón, xa que saldou os seus dous enfrontamentos cun resultado favorable, mentres que para Quique Setién foi a súa besta negra, xa que só logrou un punto de 18 posibles. A última campaña, o Lugo perdeu (0-1) en casa e igualou sen goles en Santo Domingo.
