O Burela FS entra nunha das semanas máis apaixonantes de toda a tempada, coa preparación para a fase final da Copa de España, que se celebrará entre o xoves e o domingo, en Guadalaxara. Os laranxas acudirán por segunda vez na súa historia á competición copeira tras o seu extraordinario papel o ano pasado, en Cidade Real, onde alcanzaron as semifinais batendo ao todopoderoso Inter Movistar, e quedaron a escasos segundos de xogar a final, tras ir gañando por 2-0 ante o Xaén FS.
O rival do xoves será o Catgás Santa Coloma, un equipo que pode considerarse como un dos máis alcanzables, aínda que hai dúas semanas foi capaz de golear na Vista Alegre, 1-6, algo que pon sobre aviso ao corpo técnico e os xogadores laranxas. Os burelenses serán os encargados de abrir a Copa, ás 19.00 do xoves, pero viaxarán xa mañá a Guadalaxara para completar alí as últimas sesións de preparación.
O cadro laranxa contará co equipo ao completo, salvo Matamoros, que segue recuperándose da súa lesión, aínda que a última hora xurdiu a dúbida de Isi, por un problema de xeonllo tras un xiro na pista do Xaén FS. "Confío en poder xogar. Estou a realizar algunhas probas, pero espero estar listo para axudar aos meus compañeiros en Guadalaxara", afirmou o xogador cordobés, que fala da ilusión que xera unha competición como a Copa de España. "é algo importante para o club, para o pobo e para os xogadores. Estamos a desexar que empece xa para intentar repetir o bo papel do ano pasado", sinalou.
Isi fala do duelo ante o Catgás e das claves. "é un equipo rápido e con moita pegada. Debemos intentar controlar o ritmo para non caer nun golpe a golpe que lles poida beneficiar", afirmou, recordando o que pasou na Vista Alegre neste mesmo enfrontamento fai dúas xornadas.
Isi é dúbida no Burela FS para a Copa de España
O xogador cordobés regresou do partido contra o Xaén FS con molestias nun xeonllo, aínda que confía estar en condicións de xogar o xoves fronte ao Catgás Santa Coloma
